Երևանի թիվ 86 դպրոցի և Հունգարիայում հայկական ինքնավարության միջև կնքված համաձայնագիրը կնպաստի անապահով աշակերտների բարեկեցիկ ապագայի ստեղծմանը
 Մարտիրոս Սարյանի անվան թիվ 86 հիմնական դպրոցի (տնօրեն՝ Նվարդ Հակոբյան) և Հունգարիայի Հանրապետության Դյոր քաղաքի հայերի փոքրամասնություն ինքնավարության (ղեկավար՝ Հայաստան Աղեկյան) միջև կնքվեց մշակութային բնագավառում համագործակցության մասին համաձայնագիր: Կողմերը պայմանավորվեցին իրականացնել համագործակցություն մշակութային ոլորտում՝ կազմակերպելով փոխադարձ այցեր, ինչպես նաև իրենց իրավասությունների և հնարավորությունների սահմանում, նպաստել շնորհալի աշակերտների գործունեության տարածմանն` ինչպես Հունգարիայի Հանրապետության սահմաններում, այնպես էլ դրա սահմաններից դուրս:  Դպրոց ժամանած պատվիրակության կազմի մեջ էին նաև Տուրջան Տամաշն, ով Հունգարիայի խորհրդարանի ներկայացուցիչն է և այնտեղ ներկայացնում է հայերին և Շուհա Ջորջն, ով Հունգարիայի հայ պատգամավորի արտաքին գործերի խորհրդատուն է: Հայաստան Աղեկյանը նշեց, որ նրանք բոլորն էլ ծագումով հայեր են: Դպրոցի տնօրեն Նվարդ Հակոբյանը ՄԱՄՈՒԼ.am-ի հետ զրույցում ասաց. «Վերջերս տեղեկացա, որ Հունգարիայի Դյոր քաղաքի հայերի փոքրամասնություն ինքնավարության ղեկավար Հայաստան Աղեկյանը և այլ անձիք պետք է գան Հայաստան տեսարժան վայրեր նկարահանելու և Հայաստանի մասին փոքրիկ փաստավավերագրական ֆիլմ ստեղծելու: Գաղափար հղացավ համագործակցելու՝ աչքի տակ առնելով շնորհալի աշակերտներին: Այստեղ նաև շեշտը դրվում է սոցիալապես անապահով աշակերտների համար բարեկեցիկ ապագա ստեղծելուն, համագործակցությունը կտա իր պտուղները, և երեխաներն իրենց շնորհքով կփայլեն Հունգարիայի Հանրապետությունում»:  |
