Աժ այսօրվա նիստի ժամանակ ՀԱԿ խմբակցության ղեկավար Լևոն Զուրաբյանը
հայտարարել էր, որ ԿԳ նախարար Արմեն Աշոտյանը չարաշահում է պաշտոնական դիրքը: «Խնդիրը ոչ միայն Աշոտյանի հետ է կապված, այլ նրա հրահանգները կատարող ուսուցիչների և տնօրենների, քանի որ նման ճնշումները ծնողների վրա քրեական պատասխանատվություն են ենթադրում՝ ընտրական իրավունքի իրականցմանը խոչընդոտելու համար ու պատժվում են 2-ից 5 տարի ազատազրկմամբ»,- նշել էր պատգամավորը:
Ի պատասխան Լևոն Զուրաբյանի՝ Արմեն Աշոտյանը լրագրողների հետ ճեպազրույցում ասել է. «Ես նման բան չեմ տեսել, չգիտեմ՝ ինչի մասին է խոսքը: Այն, որ նա ունի աղոտ պատկերացումներ կրթական համակարգի մասին, ինձ չի զարմացնում: Ամենամեծ ցանկության դեպքում անգամ ԿԳ նախարարը չունի վարչական լիազորություն՝ հանձնարարություն տալու ՀՀ բոլոր դպրոցներին:
Ինչ վերաբերում է ինձ մեղադրելուն, նա չունի տարրական իմացություն մարդու իրավունքների ու հիմնարար ազատությունների մասին: Կա անկեղծության կանխավարկած, հետևաբար պետք է ապացույցներ ներկայացնել իմ մեղավորության վերաբերյալ, որը գոյություն չունի»,- նշեց նախարարը: