Իրադարձություններ

Տեղի ու տարածքի համար կռիվ են տալիս ոչ միայն իշխանավորները, ոչ միայն առևտրով զբաղվողները, այլև մուրացկանները: Բնավ էլ նորություն չէ, որ մուրացկանությունը շատերի համար դարձել է մասնագիտություն և բիզնես: Երիտասարդական մետրոյի գետնանցումի աստիճանների վրա գիշերուզոր մուրացկանությամբ զբաղվող տարեց կինն այսօր վիճաբանում էր մեկ ուրիշ մուրացիկ կնոջ հետ` պահանջելով հեռանալ իր տարածքից: «Սա իմ տարածքն ա, ստեղ ես եմ նստում, դու ով ես, որ պիտի գաս իմ գործին խփես»,- ասում էր նա: Մյուսը, որը փոքրամարմին ու ցածրահասակ կին էր և առաջին հայացքից` անօգնական ու խեղճ, պաշտպանում էր իրեն` պնդելով, որ երբ ուզի կգա ու ոչ ոք չի կարող իրեն արգելել:

Տարածքի «տեր ու տիրական» ներկայացող կինը, որն ամեն օր այդ աստիճաններին նստած փող է մուրում, իր բախտակցին հանդիմանում էր, թե «դու տղա ունես, տուն ունես», էլ ինչո՞ւ ես գալիս «գործիս խփում»:

ՄԱՄՈՒԼ.am-ի թղթակցի միջամտությանը, թե ինչ հիմունքներով է նա արգելում այդ կնոջն իր օրվա հացի փողն աշխատել, որ նրանք երկուսն էլ ունեն հավասար իրավունքներ, վերջինը` ձայնը բարձրացնելով, ձեռնափայտը պարզեց այդ կնոջ ուղղությամբ. «Էսի ա՞ օրվա հացի կարոտ: Արի գնանք իմ տունն էլ տես, սրա տունուտեղն էլ տես: Աղայի նման ա ապրում: Բերում, կանգնցնում են ստեղ, ասում են` աշխտի, հետո գալիս, ավտոներով տուն են տանում…սաղ դրան ճանաչում են, մլիցեքի հետ ա գործ անում, ո՞վ ունի դրա հնարավորությունը… խեղճ ա, բա ի῀նչ ա…»: