Թուրքական դատախազությունն սկսել է հետաքննությունը երկրի խոշորագույն մեդիահոլդինգի՝ «Dogan Media Group»-ի նկատմամբ՝ «Ահաբեկչության քարոզում» մեղադրանքով: Այս մասին գրում է թուրքական «Անադոլու»-ն:
Հաղորդվում է, որ հետաքննության գործողություններին նախորդել է զոհված թուրք զինվորների նկարների՝ առանց ցենզուրայի հրապարակումն ու ոմն անձի հետ հարցազրույցը, որը հետագայում հարել է Թուրքիայում ահաբեկչական խմբավորում ճանաչված «Քուրդիստանի աշխատավորական կուսակցության» շարքերը:
Այս կապակցությամբ մեդիահոլդինգը դեռևս ոչ մի հայտարարություն չի արել:
Նախօրեին հաղորդվում էր, որ խուզարկություն է իրականացվել «Nokta» ամսագրի խմբագրությունում: Ոստիկանությունն առգրավել է ամսագրի ամբողջ համարը, որի գլխավոր շապիկին պատկերված է եղել դագաղների խորապատկերին ժպտացող Էրդողանը: