Մամուլում ու համացանցում բուռն քննարկումներ են ծավալվել այն թեմայի շուրջ, ըստ որի՝ Սուրիկ Խաչատրյանի օգնական Զարզանդ Նիկողոսյանը երեկ նշանակվել է Կապանի թիվ 6 դպրոցի տնօրենի տեղակալ: Նիկողոսյանը հայտնի է աղմկոտ պատմություններով և միշտ սկանդալների կիզակետում է:
Արդեն հայտնել էինք, որ վերոնշյալ տեղեկատվությանը ֆեյսբուքյան էջում արձագանքել է նաև Կրթության և գիտության նախարար Արմեն Աշոտյանը՝ գրելով հետևյալը. «Այսօր մամուլում հրապարակված Կապանի թիվ 6 դպրոցի փոխտնօրենի նշանակման լուրերի կապակցությամբ հայտնում եմ, որ թեպետ տվյալ դպրոցը ԿԳՆ ենթակայության չէ, կուսումնասիրեմ խնդիրը և Սյունիքի մարզպետարանի հետ լուծում կտանք»:
Իսկ մինչ այդ մեր թղթակիցը զրուցել է քաղաքական գործիչ Արամ Հարությունյանի հետ, ով այլևս որևէ բանի վրա չի զարմանում: «Ես մաթեմատիկոս եմ, ապացույցներով եմ վերլուծում: Եթե Սերժ Սարգսյանը գնում է Սուրիկ Խաչատրյանի որդու հարսանիքին և ուտելուց հետո ասում՝ դե վեր կացեք, պարեք, ուրեմն զարմանալի ոչինչ չկա: Չեմ զարմանա նաև, եթե իմանամ, որ վաղն այդ մարդուն ակադեմիայում աշխատանք են տալու»:
Երեկ, երբ լրագրողները Գալուստ Սահակյանին հարցրել էին` ինչո՞ւ են Ռուբեն Հայրապետյանը, Սուրիկ Խաչատրյանն ու Մհեր Սեդրակյանն անպատիժ մնում, ԱԺ նախագահն ասել էր, թե դա լրագրողների տեսակետն է, իրավապահները քրեական ոչ մի գործ չեն հարուցել:
Մեր թղթակցի դիտարկմանը՝ ստացվում է՝ անպատժելիությունը ոչ միայն շարունակվում է, այլև՝ կատարելագործվում, Արամ Հարությունյանն ասաց. «Սերժ Սարգսյանը միայն նրանց է պատժում, ովքեր իրեն «քցել են», իսկ Սուրիկ Խաչատրյանը և մյուսները նրա համար միայն աշխատանքներ են մատուցում»: