«Կարևոր է, որ նոր ֆուտբոլիստները մերվեն թիմի խաղաոճին». Արտակ Օսեյան
17:11, հինգշաբթի, 27 օգոստոսի, 2015 թ.
 Դավիթ Արշակյանի մասին «Բոլոր նորեկներն էլ երկար ժամանակ մեր ուշադրության կենտրոնում են եղել, ուսումնասիրել ենք նրանց խաղը և եկել այն եզրակացության, որ նրանք անհրաժեշտ են հավաքականին: Մենք անընդհատ հետևել ենք Դավիթ Արշակյանի խաղին: Վերջին շրջանում նա բավականին հաջող է հանդես գալիս լիտվական «Տրակայի» կազմում, գոլեր է խփում և լավ մարզավիճակում է: Բարձրահասակ հարձակվող է, լավ է խաղում գլխով, տուգանային հրապարակում շատ արագ է կողմնորոշվում: Ուժեղ կողմերից է նաև այն, որ շատ լավ է աշխատում մեջքով դեպի մրցակցի դարպասը: Իմ կարծիքով նրա գալով մենք կարող ենք բազմազանություն մտցնել մեր հարձակման գծում: Բնականաբար, մենք չենք շտապում, քանի որ դեռ պետք է տեսնել, թե ինչպես Արշակյանը կմերվի թիմի խաղին, կհասկանա մեր խաղաոճը, բայց նախնական տպավորություններով՝ նա կարող է օգտակար լինել մեզ»: Շանթ Բեդրոսյանի մասին «Դե Գրաֆսհապի» կիսապաշտպան Շանթ Բեդրոսյանի խաղին նույնպես հետևել ենք և որոշակի պատկերացում ունենք նրա հնարավորությունների մասին: Շանթը եզրային կիսապաշտպան է, կարող է խաղալ եզրերից յուրաքանչյուրում: Սակայն, հաշվի առնելով, որ Հոլանդիայում թիմերի գերակշռող մասը խաղում է 4-3-3 տակտիկական դասավորությամբ, իսկ եզրային խաղացողներն ավելի շատ հարձակվողներ են, դեռ պետք է տեսնենք, թե որքանով Շանթը կկարողանա հարմարվել մեր խաղաոճին»: Աղավարդ Պետրոսյանի մասին «Ինչ վերաբերում է Աղավարդ Պետրոսյանին, ապա նրան հետևելու ավելի շատ հնարավորություններ ունենք, քանի որ խաղում է Հայաստանում: Նախորդ հավաքին հրավիրվել էր Գագիկ Մաղաքյանը, բայց, հաշվի առնելով, որ Մաղաքյանը վերջին շրջանում քիչ է խաղում, իսկ Աղավարդ Պետրոսյանը մինչև 19 տարեկանների հավաքականի կազմում մասնակցել է միջազգային հանդիպումների և լավ տպավորություն է թողել, որոշեցինք այս անգամ հավաքական հրավիրել Աղավարդ Պետրոսյանին: Լավ տվյալներով, խաղը լավ հասկացող կենտրոնական պաշտպան է: Նրա համար դժվար կլինի միանգամից հիմնական կազմում տեղ գտնելը, բայց ավելի բարձր տարիքային հավաքականի հետ մարզվելը միանշանակ օգտակար կլինի: Ռումինիայի հավաքականի հետ հանդիպման մասին Առաջին հանդիպումը ռումինացիների հետ ցույց տվեց, որ նրանք բավականին ուժեղ թիմ ունեն: Ռումինացիները շատ ագրեսիվ սկսեցին մեր հետ հանդիպումը, և մեր պաշտպանությունը չդիմացավ ճնշմանը ու մի քանի կոպիտ սխալներ թույլ տվեց: Առաջին խաղում պարտությունը կապում եմ առաջին հերթին մեր պաշտպանական գծի անփորձության և թիմային ընդհանուր խաղակցվածության պակասի հետ: Մենք մի քանի անգամ նայել ենք տեսագրությունը, հասկացել ենք մեր սխալները, որոնք, մեր կարծիքով, շտկելի են: Կարծում եմ, որ մեր հավաքականը բավականաչափ պոտենցիալ ունի՝ այս անգամ ավելի հաջող հանդես գալու համար»: Արտյոմ Սիմոնյանի մասին «Ես խոսել եմ ազգային հավաքականի գլխավոր մարզիչ Սարգիս Հովսեփյանի հետ, ով նշել է, որ Արտյոմ Սիմոնյանը պետք է ազգային հավաքականին, քանի որ ունի շատ լավ որակներ և ներկայումս լավ մարզավիճակում է: Այդուհանդերձ, Սիմոնյանը մեր թիմի ավագն է, առանցքային խաղացող, և ըստ պայմանավորվածության, եթե խաղաժամանակ չստանա ազգային հավաքականում, երիտասարդական հավաքականի կազմում կմասնակցի Ռումինիայի դեմ հանդիպմանը»: |
3109 | 0
