Ռուսաստանի Կազան քաղաքում զինծառայող Ալեքսեյ Վասիլևը փրկել է 3 տարեկան աղջիկ երեխային, ով ընկել է շենքի 6-րդ հարկից:
Ինչպես հաղորդում է «Արգումենտի ի ֆակտ»-ին, Ալեքսեյն աշխատանքից տուն վերադառնալիս է եղել, երբ շենքի մոտ հավաքված բազմություն է տեսել: Մոտ գալով` նա տեսել է շենքի 6-րդ հարկի շքապատշգամբի ճաղերից կախված երեխայի: Նա անմիջապես մոտ է վազել, հենց այդ պահին երեխան ընկել է, և զինծառայողը որսացել է նրան: Երեխան ոչ մի լուրջ վնասվածք չի ստացել:
Զինակիցներն Ալեքսեյի քաջագործության մասին իմացել են միայն մեկ շաբաթ անց, երբ նա դիմել է զինվորական հիվանդանոց: Պարզվել է, որ նա ձեռքի մի քանի կոտրվածք է ստացել:
Իր արածը երիտասարդը սխրանք չի համարում ու վստահ է, որ իր փոխարեն ցանկացած տղամարդ, այն էլ զինվորական, նույն կերպ կվարվեր: