Եվրոմիության արտաքին հարցերով հանձնակատար Ֆեդերիկա Մոգերինին, ով Իրանի հետ կնքված միջուկային համաձայնագրի իրագործումը քննարկելու նպատակով մեկնել էր Իրան, հանդիպում է ունեցել այդ երկրի նախագահ Հասան Ռոհանիի և արտգործնախարար Մուհամմադ Զարիֆի հետ: Այս մասին հաղորդում է իրանական «Ֆարս» գործակալությունը:
Իրանի նախագահի հետ հանդիպման ժամանակ Մոգերինին հայտնել է, որ Եվրոմիությունը չափազանց մեծ ջանքեր է ներդրել Իրանի հետ այդ համաձայնագրի կնքման համար, ուստի պատրաստվում է նույնքան մեծ ջանքեր և քաղաքական կամք դրսևորել այդ համաձայնագրի կատարման համար:
«ԵՄ-ը պատրաստ է և որոշել է նոր էջ բացել Իրանի հետ հարաբերություններում: Ես ԵՄ անունից վստահեցնում եմ, որ մենք միասնական ենք և կատարելապես աջակցում ենք այդ համաձայնագրին»,- նշել է Մոգերինին` հավելելով, որ ինքը որպես ԵՄ անդամ պատրաստվում է հետևել այդ համաձայնագրի կատարման ճանապարհին իրականացվող բոլոր քայլերին:
Իրանի նախագահն իր հերթին հավելել է, որ այդ համաձայնագիրը նպաստելու է ոչ միայն տարածաշրջանային, այլև համաշխարհային անվտանգությանը: