«Մոսկվա» կինոթատրոնում, ՀՀ ժողովրդական արտիստ, համաշխարհային կինոյի վարպետ, բոլոր ժամանակների դասական Արտավազդ Փելեշյանի հետ հանդիպումն աննախադեպ բազմություն էր հավաքել:
«Արտավազդ Փելեշյանի հաղթանակը կինոյի հաղթանակն է, մեզ համար այդ հաղթականաը հայ ոգու հաղթանակն է: Մենք` Հայաստանում ապրողներս, այսօր նրա կարիքը մեծապես ունենք»,- այս խոսքերով ողջունեց ռեժիսորին մաեստրո Տիգրան Մանսուրյանը:
«Փելեշյանի անցաթուղթը աշխարհով մեկ մեր անցաթուղթն է, մեր մշակութային աշխարհ մտնելու իրավունքն է»,- նշեց մաեստրոն:
Երեկոյի ընթացքում ցուցադրվեցին Փելեշյանի ֆելմերն ու հանդիսատեսը հնարավորություն ունեցավ հարցուպատասխանի: Ռեժիսորն իրեն ու իր ֆիլմերին բնորոշ սրությամբ, ու միևնույն ժամանակ լակոնիկ պատասխաններ էր տալիս բոլոր հարցերին:
Նա նշեց, որ եթե այսօր նկարահաներ այդ ֆիլմերը, որոնք նկարել է տարիներ առաջ, ոչինչ չէր փոխի, կնկարեր նույն կերպ:
«Ես ալբոմներ եմ նայում, տեսնում եմ նկարներ, որոնցում երիտասարդ տարիներին բեղեր էին թողնում, ի՞նչ միտք ունի այդ նկարները ոչնչացնել կամ բեղերը ջնջել»:
Արտավազդ Փելեշյանը խոստովանեց, որ «Հայոց աշխարհ» վերնագրով սցենար է գրել, որը, սակայն, նկարահանել չի հաջողվել ֆինանսական խնդիրների պատճառով: «Հիմա արդեն մեծացել եմ, չգիտեմ, ինչ կլինի»,- կես կատակ կես լուրջ ասաց ռեժիսորը: