Միջազգային

«Երդում տվածներ»` այսպես են անվանում Վրաստանի Պանկիսի կիրճում այն մարդկանց, ովքեր անդամակցել են «Իսլամական պետություն» ահաբեկչական խմբավորմանը: Այդ «երդում տվածներից» մեկի` Աբդուլի հետ էլ հարցազրույց է ունեցել «ԵվրԱսիաԴեյլի» խմբագրականի լրագրողը: Աբդուլը մի քանի ամիս առաջ է վերադարձել Սիրիայի` ԻՊ կողմից վերահսկվող տարածքներից:

-Ինչո՞ւ որոշեցիք անդամակցել «Իսլամական պետության»-ը:

-Բայաթի (արաբ.` երդում) մասին մեր որոշումը պայմանավորված է Ղուրանի` խալիֆաթ ստեղծելու մարգարեությամբ: Մեզ իսլամն է պարտադրում դա անել: Մենք անդամակցել ենք ԻՊ-ին, որ պայքարենք մահմեդականների կյանքի համար, նրանց բարեկեցության ու «Իսլամական պետության» ամրապնդման համար:

-Պանկիսի կիրճում շատերը կարծում են, որ որոշ ուժեր զբաղվում են մարդաորսությամբ: Ինչպես է եղել ձեր պարագայում:

-Որքանով որ ես գիտեմ, ԻՊ ամեն մի անդամ պետք է գնա Սիրիա, որովհետև Սիրիայի ժողովրդին օգնություն է պետք: Նրանց սպանում են, տանջում են ու մենք պարտավոր ենք նրանց օգնել:

-Բայց չէ՞ որ ԻՊ-ն էլ է սպանում մահմեդականներին:

-Ո՞ւմ եք ենթադրում մահմեդական ասելով, Ասադի կողմնակիցների՞ն: Նրանք մահմեդականներ չեն: Ոչ մի խմբավորում, բացի ԻՊ-ից, չի իրականացնում շառիաթի օրենքները: Նրանք համագործակցում են Սաուդյան Արաբիայի և Թուրքիայի հետ: Եղել են դեպքեր, երբ Ասադի բանակը կամ միջազգային կոլաիցիոն ուժերը ԻՊ-ին ռմբակոծել են այլ խմբավորումների տարածքներից, օրինակ` Ջաբհաթ ալ-Նուսրայի:

-Ինչո՞ւ վերադարձաք Վրաստան:

-Շամում (ԻՊ գրավյալ տարածքներ) շառիաթ է, իսկ այստեղ` իմ ընտանիքը: Ես կատարել եմ իմ պարտքը Սիրիայում և հետ եմ վերադարձել: Բայց բոլոր երդվածները վաղ թե ուշ պետք է վեադառնան խալիֆաթ: Առայժմ դա անհնար է, որովհետև մեր ընտանիքները չեն ուզում գնալ, վախենում են:

-Իսկ ինչպե՞ս են մարդիկ ընկնում Սիրիա:

-Որպես կանոն` անցնում են թուրքական սահմանով: Այս առումով թուրքերի հետ ոչ մի խնդիր չկա: Մարդիկ ազատորեն գնում են այնտեղ ու գալիս:

-Ուզում եք ասել, որ թուրքերը ոչ մի արգելք չե՞ն դնում:

-Եթե թուրք սահմանապահները ցանկանան, ճնճղուկն անգամ չի հատի սահմանը: Օրինակ, երբ ես էի անցնում, թուրք-սիրիական սահմանին կանգնած էին սահմանապահներ: Նրանք գիտեին, որ մենք անցնում ենք ԻՊ գրավյալ տարածք, բայց ոչ մի արգելք չդրեցին: Սովորաբար, նրանք հեռվից նայում են ու ձևացնում, թե չեն հասկանում` ինչ է կատարվում:

-Քանի՞ պանկիսցի է ԻՊ շարքերում մասնակցում ռազմական գործողություններին:

-Ստույգ թիվն ասել չեմ կարող, բայց մի քանի տասնյակ մարդիկ են: Նրանց մեծ մասը ԻՊ-ի անդամ է, մնացածները կռվում են պանկիսյան առաջնորդների խմբավորումներում, ինչպիսիք են Մուսլիմ Մարգոշվիլին ու Ալ Բարա Շիշանին:

-Վերջերս Վրաստանն օրենք է ընդունել, որի համաձայն ապօրինի զինյալ խմբավորումներին անդամակցելը դարձել է պատժելի արարք: Ի՞նչ եք կարծում, օրենքի խստացումը կկանգնեցնի՞ Սիրիա մեկնողներին:

-Ով ուզում է գնալ, միևնույն է, կգնա: Բայց էլ այստեղ չի վերադառնա:

Իմ կարծիքով` իշխանությունը չպիտի նան որոշում կայացներ: Մենք ախր Սիրիա ենք գնում նրա համար, որ օգնենք մեր եղբայրներին: Եթե Վրաստանին օգնություն պետք լինի, մենք պետք է պաշտպանենք նրան, չէ՞: Հիշեք Գալաևին, երբ նա իր մարտիկներով մտավ Աբխազիա:

-Դուք որն եք համարում ձեր հայրենիքը` Վրաստա՞նը, թե՞ Խալիֆաթը:

-Խալիֆաթը: Բայց մենք ապրում ենք Վրաստանում, և սա մեր երկիրն է: Եթե Վրաստանը մեզ դեմ չգնա, մենք էլ նրա դեմ չենք կանգնի: Բայց եթե մեզ նեղացնեն, ապա մենք ստիպված կինենք պաշտպանել մեզ, և դրանում մեզ կօգնեն շատ մուսուլմաններ:

Հիմա նրանք օգնության են գնում Սիրիա, բայց եթե պետք լինի, այստեղ էլ կգան:

Այնուամենայնիվ, ես չեմ կարծում, որ իրավիճակը կթեժանա: Մենք կարծում ենք, որ «Իսլամական պետությունը» բանակցություններ է սկսելու Վրաստանի հետ:

-Ի՞նչ թեմայով:

-Երդում տվածների անձեռնմխելիության շուրջ բանակցույթունների: Եթե նրանք մտադիր չլինեին խաղաղ ճանապարհով հարցին լուծում տալու, ապա Վրաստանում իրավիճակը վաղուց սրված կլիներ: Մանրամասներ չգիտենք, բայց Պանկիսում բոլորը կարծում են, որ բանակցություներ լինելու են:

-Ո՞վ է հանդես գալու բանախոսի դերում, Թարխան Բատիրաշվիլի՞ն:

-Այո:

-Դուք նրան տեսե՞լ եք Սիրիայում:

-Այո, բայց չեմ ուզում խոսել այս թեմայով:

-ԻՊ-ը Վրաստանի տարածքը հայտարարել այսպես կոչված «Գյուրջիստանի վիլայեթ»: Ի՞նչ է սա նշանակում:

-Սա նշանակում է, որ Վրաստանը դարձել է խալիֆաթի մի մասը: Բայց դա չի նշանակում, թե մենք մարդկանց ահաբեկչության կոչ ենք անելու: Մեր պարտականությունն է Վրաստանում իսլամ քարոզելը:

-Ի՞նչ ծրագրեր ունեք կովկասյան տարածաշրջանում:

-Ծրագրվում է Ինգուշեթիայի, Չեչնիայի, Դաղստանի և մահմեդական այլ տարածքների ազատագրումը: Ինքնըստինքյան այդ ցուցակում է մտնում և Վրաստանը, քանի որ այն հանդիսանում է հնագույն խալիֆաթի մի մասը: Ինչ վերաբերում է տարածքի այլ երկրներին, ինչպիսին Հայաստանն է, ժամանակի ընթացքում իսլամը կտարածվի նաև այնտեղ:

-Կապեր ունե՞ք Հյուսիսային Կովկասի գրահոյինների հետ:

-Դեռ ոչ:

-Վերջերս ձերբակալել են Վրաստանում ԻՊ ներկայացուցիչ Այուբա Բորչաշվիլիին: Ինչ եք կարծում այս մասին:

-Վրաստանի իշխանությունը դիտմամբ սրեց իրավիճակը: Նրանք ուզում են աշխարհին ցույց տալ, թե պայքարում են ահաբեկչության դեմ: Մի անգամ նրանք արդեն մահմեդականների հարցերը լուծել են, ես նկատի ունեմ Լապանկուրի հատուկ գործողությունը: Հիմա դա կրկնվում է:

-Ինչ կձեռնարկեք, եթե Բորչաշվիլիին դատեն:

-Մենք ոչինչ ձեռնարկելու իրավունք չունենք, մինչև չստանանք ԻՊ ղեկավարության հրամանը: Նրանք կքննարկեն այս հարցը և մեզ իմաց կտան:

-Այսինքն, նրանք տեղյա՞կ են Վրաստանի անցուդարձից:

-Բնականաբար: Նրանք ամեն ինչ վերահսկում են, ամեն մի երդվողի ճակատագիր այնտեղ է վճռվում: Նրանք պարտավոր են օգնել Բորչաշվիլիին:

-Ապագայի ի՞նչ ծրագրեր ունեք:

-Ուզում էի Թուրքիա գնալ փող աշխատելու, բայց վրացի սահմանապահները չթողեցին, երևի մտածեցին, որ նորից կգնամ Սիրիա: Ես ջահել տղա եմ, ուզում եմ պսակվել, բայց ինչո՞վ կարող եմ զբաղվել Պանկիսում: Այստեղ գործ չկա:

-Ի՞նչ եք կարծում, եթե Պանկիսում աշխատանքի խնդիրը լուծվեր, երիտասարդները կշարունակեի՞ն Սիրիա գնալ:

-Իհարկե: Մի քնաի օր առաջ ևս մի երիտասարդ գնաց կիրճից: Գնալ ցանկացողներին չի կանգնեցնի և ոչ մի ուժ: