Հունաստանում այսօր վաղ առավոտյան մեկնարկել է միջազգային վարկատուների առաջ քաշած պայմաններին համաձայնելու կամ դրանք մերժելու վերաբերյալ վճռորոշ հանրաքվեն:
Ինչպես հաղորդում է «Ռոյթերս»-ը, քվերակությունը մեկնարկել է առավոտյան 07:00-ին, իսկ ընտրատեղամասերը փակվելու են արդեն երեկոյան 19:00-ին: Սպասվում է, որ հանրաքվեի արդյունքների մասին առաջին նախնական տեղեկությունը հայտնի կդառնա ընտրատեղամասերի փակվելուց երկու ժամ անց՝ 21:00-ին:
Երկրի ՆԳՆ-ի տեղեկություններով, հանրաքվեին կարող է մասնակցել մինչև 8,5 միլիոն մարդ: Նրանք պետք է կարևոր որոշում կայացնեն. ընդունել միջազգային վարկատուների առաջարկները և շարունակել խստացված տնտեսությունը, թե մերժել Եվրահանձնաժողովի, Արժույթի միջազգային հիմնադրամի և Եվրոպայի Կենտրոնական բանկի առաջարկները:
Հանրաքվեն և դրա արդյունքները համարվելու են վավեր, եթե այն ապահովվի 40% և ավելի մասնակցություն:
Հաղորդվում է նաև, որ հունական իշխանություններն ակնկալում են, որ ժողովուդը դեմ կքվեարկի եռյակի պահանջներն ընդունելուն: