Քիչ առաջ Բաղրամյան պողոտայում Երևանի մամուլի ակումբի նախագահ Բորիս Նավասարդյանը, պատասխանելով այն հարցին, թե արդյոք իշխանությունը որևէ կերպ կարձագանքի ցուցարարների վերջին որոշմանը, նշել է.
«Կարծում եմ` դա հստակ ուղերձ էր իշխանություններին, որ համբերությունն անվերջ չէ: Պատասխանը մեկը կարող է լինել՝ հռչակված 3 պահանջներից գոնե մեկը կամ երկուսը պետք է կատարվեն անպայման»:
Անդրադառնալով «Ազատության» լրագրողի այն հարցին, թե իր կարծիքով քանի օրում ցուցարարները կհասնեն Բաղրամյան 26, Նավասարդյանը նշել է. «Եթե հաշվի առնենք, որ ոստիկանների և բարիկադների միջև տարածք պետք է լինի, կարծում եմ՝ մեկ ամիս: Այստեղ ոչ այնքան մաթեմատիկան է կարևոր, որքան ինքը՝ բովանդակությունն այդ վերջնագրի: Շատ դժվար է կանխատեսել՝ ինչ է լինելու: Ամեն դեպքում, եթե մարդիկ շարունակեն ակտիվ մասնակցել ակցիային և ակցիան չմարի, ինձ թվում է` ազդեցիկ որոշում է կայացվել»: