ՌԴ նախագահ Վլադիմիր Պուտինն Անվտանգության խորհրդի նիստի ժամանակ հայտարարել է, որ Ռուսաստանի նկատմամբ ճնշումներ են իրականացվում, քանի որ իրենք անձեռնմխելի են պահում իրենց երկրի ինքնիշխանությունը: Պուտինը նշել է, որ թեև չեն ակնկալում, որ Արևմուտքը կփոխի իր ոչ բարիդրացիական վերաբերմունքը Ռուսաստանի հանդեպ, սակայն կարևորն այն է, որ հակառուսական պատժամիջոցները նրանց սպասելիքները չեն արդարացրել: Այս մասին հաղորդում է «Բլումբերգ»-ը:
«Ռուսաստանի հանդեպ կիրառվող ճնշումների պատճառն այն է, որ Ռուսաստանը բոլորից անկախ ներքին և արտաքին քաղաքականություն է վարում: Դա բոլորին չէ, որ դուր է գալիս, սակայն այլ կերպ չի կարող լինել»,- հայտարարել է Պուտինը:
ՌԴ նախագահն անդրադարձել է նաև ՌԴ հանդեպ Եվրոմիության պատժամիջոցների երկարաձգմանը՝ նշելով. «ԵՄ-ը կրկին անգամ երկարաձգեց իր այսպես կոչված պատժամիջոցների ժամկետը: Սակայն մեր նկատմամբ պատժամիջոցներ կիրառողներն ուկրաինական ճգնաժամի իրական մեղավորներն են»: