Միջազգային

ՌԴ նախագահ Վլադիմիր Պուտինի խոսնակ Դմիտրի Պեսկովը հայտարարել է, որ այսօր տեղի ունեցած հեռախոսազրույցի ընթացքում Հայաստանի նախագահ Սերժ Սարգսյանը և Ռուսաստանի նախագահ Վլադիմիր Պուտինը չեն քննարկել Հայաստանում էլեկտրաէներգիայի սակագինը: Այս մասին հաղորդում է «ՏԱՍՍ»-ը:

Լրագրողների այն հարցին, թե արդյոք երկու երկրների նախագահներն այսօր քննարկել են Երևանում վերջին օրերին զարգացող իրադարձությունները, Պեսկովը պատասխանել է. «Քննարկվել են հիմնականում երկկողմ հարաբերությունները: Ինչ վերաբերում է Հայաստանում էլեկտրաէներգիայի գներին, ապա դա Հայաստանի ներքին հարցերից է, որը, բնականաբար, չի կարող քննարկվել Ռուսաստանի հետ»:

Պեսկովը հավելել է նաև, որ երկու ղեկավարները կարծիքներ են փոխանակել Եվրասիական տնտեսական միության շրջանակներում ինտեգրացիոն գործընթացների շուրջ: