ՄԱԿ խաղաղապահական զորքերը պարբերաբար փոխանակում են ապրանքներ այն մարդկանց հետ սեքսուալ հարաբերություններով, ում որ հասցեագրված է այդ օգնությունը: ՄԱԿ-ի ներքին վերահսկողական ծառայությունների կազմած հաշվետվության մեջ ասվում է, որ Հաիթիում և Լիբերիայում հարյուրավոր ծայրահեղ աղքատ ու սովյալ կանայք սեքսուալ ծառայություններ են մատուցել խաղաղապահներին:
Փոխարենը նրանք ստացել են գումար, հագուստ, թանկարժեք իրեր, բջջային հեռախոսներ և այլ առարկաներ: Վերոնշյալ հաշվետվության տեքստը հայտնվել է «Ռեյթեր» գործակալության լրագրողի տրամադրության տակ:
2008-13 թթ. արձանագրվել են մոտ 480 նմանատիպ խախտումներ: Ընդ որում՝ սեքսուալ գործողությունների մեկ երրորդը իրականացվել են անչափահասների հանդեպ:
«Ռեյթեր»-ը, մեջբերելով հաշվետվության տեքստը, գրում է. «Այն 2 երկրներից ստացված վկայությունները, որտեղ ուղևորվել են խաղաղապահները, փաստում են, որ վճարովի սեքսուալ ծառայությունները բավականին տարածված են, սակայն դրա մասին շատ քիչ է խոսվում»:
Իր հերթին «Ասոշիեյթիդ Փրեսս»-ն, ով ևս ստացել է չհրապարակված տեքստի կրկնօրինակը, գրում է, որ միայն Հաիթիում անցյալ տարի գրանցվել է նմանատիպ 231 դեպք: Ընդ որում, այն դեպեքերում, երբ խաղաղապահները հրաժարվել են իրենց խոստացածը սեռական հարաբերությունից հետո տալ կանանց, վերջինները խլել են նրանց կրծքանշաններն ու սպառնացել համացանցով ամեն ինչ բացահայտել:
ՄԱԿ-ը չի թաքցնում, որ մտահոգված է իր խաղաղապահների ամոթալի վարքագծով, սակայն ընդգծում է, որ վերջին տարիներին ամբողջ աշխարհում կտրուկ ավելացել է խաղաղապահների թիվն, իսկ նրանց կողմից սեքսուալ բնույթի շահագործումների թիվը՝ նվազում:
Ներկա պահին աշխարհի տարբեր երկրներում տեղակայված է ՄԱԿ 125 հազար խաղաղապահ: