Իրադարձություններ

     2014-ի բյուջեի կատարողականի քննարկման ժամանակ, դիմելով ՀՀ Արտաքին գործերի փոխնախարար Սերգեյ Մանասյանին, ԱԺ ԲՀԿ խմբակցության ղեկավար Նաիրա Զոհրաբյանը հետաքրքրվեց. «ՀՀ ԱԳՆ-ն ունի՞ ռազմավարություն` ինչպես հակազդել Ադրբեջանի խավիարային դիվանագիտությանը, քարոզչությանը, ռազմավարությանը, որն ակտիվ աշխատում է միջազգային կառույցներում ու դրա հետևանքները տեսնում ենք` հօգուտ Ադրբեջանի»:
     «Մենք յուրաքանչյուր երկրում բարձր ամբիոններից բարձրաձայնում ենք` ասելով` տեսեք մեր հարևաններն ինչ մեթոդների են դիմում: Հակազդելու այլ միջոցներ չկան»,- արձագանքեց փոխարտգործնախարարը:
     Զոհրաբյանը համաձայնեց, որ բարձր ամբիոններից մեր պատվիրակները խոսում են այդ մասին, բարձրաձայնում խնդիրը, բայց արդյունավետությունը բավարար չէ. «Անկեղծ ասած` աղմուկի, եվրոպացի խավիարակիր պատգամավորների լուսանկարները անարգանքի սյունին գամելու արդյունավետությունը չեմ տեսնում: Այստեղ պետք է ճիշտ օգտագործենք նաև Սփյուռքի ներուժը ու ոչ թե նրանց դիտարկենք միայն «Հայաստան» համահայկական հիմնադրամում ծրագրերի իրականացման հարցերի ժամանակ»,- հավելեց Զոհրաբյանը: