«ՍՕՍ Մանկական Գյուղեր» հայկական բարեգործական հիմնադրամն ու ՀՀ Մարդու իրավունքների պաշտպանի գրասենյակը 2014-ին մոնիթորինգ են իրականացրել` մուրացկան երեխաների խնդիրների հետ կապված ու հոլովակ նկարահանել, որտեղ նշվում է, որ մուրացկան երեխաներին գումար տալով` խաչ են քաշում նրանց ճակատագրի վրա: «Ակցիան որքանով տեղ հասավ, լուսաբանվեց` չգիտեմ, քանի որ եթերավճարն այնքան թանկ է, որ չենք կարողանում ցուցադրել, միայն սոցցանցերում է շրջանառվում: Հոլովակից հետո մարդիկ ահազանգում էին մեզ, որ փողոցում տեսել են մուրացիկ երեխաների, մենք էլ, համագործակցելով քաղաքապետարանի, ոստիկանության ու սոցապ նախարարության հետ, կարողացել ենք նրանց հարցը լուծել»,- ասաց ՀՀ օմբուդսմենը` դիմելով ոչ միայն բյուջեի կատարողականի քննարկմանը ներկա պատգամավորներին, այլև բոլոր պաշտոնյաներին. «Գալիս է հունիսի 1-ը` երեխաների իրավունքների պաշտպանության օրը: Գեղեցիկ շնորհավորանքներից բացի առաջարկում եմ մտածել վատ պայմաններում ապրող երեխաների մասին»,- նշեց Կարեն Անդրեասյանը: