Մոնթե Մելքոնյանի անվան վարժարանում լրագրողների հետ զրույցում անդրադառնալով Վազգեն Սարգսյանի անվան ռազմական ինստիտուտի կուրսանտ
Հայկազ Բարսեղյանի մահվան դեպքին՝ ՀՀ Պաշտպանության նախարարն ասել է. «Հիմնական գործընթացն այժմ իրավական դաշտում է: Անընդհատ համագործակցում ենք իրավական ոլորտի մեր գործընկերների հետ և անելու ենք ամեն ինչ, որպեսզի հարցն իր վերջնական և արդար ավարտին հասնի: Այն մարդիկ, ովքեր իրականացրել են, պատժվելու են: Ես իրավապահներին հարց եմ տվել` որևէ խոչընդոտ կա՞, որևիցե մեկը փորձե՞լ է կողքից ազդեցություն ունենալ... Որևէ մեկը չի փորձել մտնել խնդրի մեջ, ու ես հետևողական եմ լինելու այդ հարցում»:
Խոսելով ՊՆ համակարգում կոռուպցիայի դեմ պայքարի ու դրա արդյունքների մասին` Սեյրան Օհանյանը նշել է. «Կոռուպցիայի, կաշառակերության դեմ պայքարն իրականացվում է ծրագրային առումով, մշակվել է ծրագիր` միջազգային կառույցների աջակցությամբ, իսկ բացահայտումների մեծ մասն ինքներս են անում: ՊՆ-ն ապացուցել է, որ զարգացող կառույց է, հենվելով դրականի վրա` ապահովում է առաջընթաց, բացթողումները բացահայտում է ու փորձում վերացնել»: