Իրադարձություններ

     «ՀՀ-ում ուռուցքաբանության կենտրոն է ստեղծվում, մինչդեռ ոլորտը ողբալի վիճակում է, չկա գեթ մեկ վճարունակ քաղաքացի, որ նման ծանր հիվանդության դեպքում առողջությունը վստահի ոլորտի որևէ մասնագետի: Շենքային առումով կարող ենք լավագույն կենտրոն ունենալ, բայց մասնագետներ չունենք»,- դիմելով Առողջապահության նախարար Արմեն Մուրադյանին` ասաց ԱԺ ԲՀԿ խմբակցության պատգամավոր Նաիրա Զոհրաբյանը: «Հակաքաղցկեղային նույնանուն դեղերը, որ բերվում են Եվրոպայից, մեկ կամ երկու ընկերություն է մատակարարում. որակական առումով նույն դեղերը խստագույնս տարբերվում են իրենց ազդեցությամբ»,- ասաց նա:
     «Մեծ գործընթաց է իրականացվում կենտրոնի հետ կապված: Չկա մեկ երկիր, որտեղ ուռուցքաբանության գործընթացը կանգնած լինի, զարգացում չապրի: Յուրաքանչյուր դեղ անցնում է փորձաքննության, բայց Ձեր մտահոգությունը կիսում եմ, ըստ որի` հիվանդները նշում են դեղերի տարբերության մասին, բայց հարցին օբյեկտիվ պատասխան կարող են տալ լաբորատոր փորձաքննությունները, որի հնարավորությունն այսօր կա»,- ասաց Մուրադյանը:
     Նաիրա Զոհրաբյանը շարունակեց. «Ինչ վերաբերում է դեղորայքին, ամենասովորական ցավազրկող «Նուրոֆենը» բերեք եվրոպական ցանկացած երկրից ու առեք Հայաստանի դեղատներից: Առեք ՀՀ դեղատների «Նուրոֆենն» ու Ձեր գլխացավը կկրկնապատկվի, խմեք Եվրոպայի դեղատների` «Ադվիլ Նուրոֆենը», անմիջապես կանցնի»,- հավելեց Զոհրաբյանը: