Ֆրանսահայ լուսանկարիչ Անտուան Ագուջյանն ապրիլի 22-ին Թուրքիայի Դիարբեքիր քաղաքում` պատմական Տիգրանակերտում, կներկայացնի «Լռության ճիչ» խորագրով ցուցահանդեսը` նվիրված Հայոց ցեղասպանության 100-րդ տարելիցին:
Մինչև պատմական հայրենիք մեկնելը լուսանկարիչը նախ ցանկանում է հայաստանցիներին ցուցադրել իր աշխատանքները:
Անտուան Ագուջյանը հանդիսատեսին կներկայացնի 27 տարվա աշխատանքի արդյունքը: Լուսանկարիչի փոխանցմամբ` իր տատն ու պապը գաղթել են Արևմտյան Հայաստանից: Նրա հիշողության մեջ մինչ օրս վառ են մնացել լսած պատմությունները, որոնք նա փորձել է ներկայացնել լուսանկարների միջոցով:
«Հայկական հիշողության վրա կառուցեցի մի պատմություն` փորձելով ավելի արտիստիկ մատուցել»,- նշել է լուսանկարիչը: Նա հույս ունի, որ սև ու սպիտակ լուսանկարները կպատմեն այն ժողովրդի պատմությունը, որը ապրել է այդ հողում, իսկ հիմա սփռված է ամբողջ աշխարհում: