Հայազգի հայտնի երգչուհի Մարիամ Մերաբովան, ում ելույթները կարելի է Ռուսաստանի ջազային լավագույն հարթակներում, շուտով կներկայանա Հայաստանի և Արցախի հանդիսատեսին:
Համերգին կհնչեն հայտնի և նոր ստեղծագործություններ` երգչուհու և «Միրայֆ» բենդի երգացանկից, ինչպես նաև առաջին անգամ նրա համերգային ծրագրում կհնչեն հայերեն երգեր: Մինչև երևանյան համերգը երգչուհին բարեգործական համերգով հանդես կգա Ստեփանակերտում:
Կազմակերպիչների փոխանցմամբ` բարձրորակ ջազային երաժշտություն նախընտրող լսարանին սպասվում է շքեղ և անչափ հետաքրքիր համերգային շոու:
«Թեև ապրում եմ Մոսկվայում, բայց չեմ դադարում հայ լինելուց»,- ասել է Մարիամ Մերաբովան:
Ծնվել է 1972-ին Երևանում: 5 տարեկանից Մարիամը հաճախել է Երևանի Չայկովսկու անվան երաժշտական դպրոցը, այնուհետև ուսումը շարունակել է Մոսկվայում: 1998-ից իր ամուսնու` կոմպոզիտոր և պրոդյուսեր Արմեն Մերաբովի հետ աշխատում է «Միրայֆ» ջազային խմբում, որը բավական հայտնի է Ռուսաստանում:
«Միայն շնորհիվ իմ ամուսնու ես բացահայտվեցի։ Նա իմ ուսուցիչն է»,- անկեղծացել է երգչուհին: Նա մասնակցել է ջազային բազմաթիվ հեղինակավոր փառատոնների:
Մարիամ Մերաբովան հանրությանն առավել հայտնի դարձավ «Գոլոս» միջազգային մրցույթից, որտեղ «Georgia On My Mind» համաշխարհային հիթի կատարումով միանգամից գրավեց որակյալ երաժշտության սիրահարներին:
Ջազային երգչուհու երկար սպասված մենահամերգը Հայաստանում տեղի կունենա ապրիլի 5-ին, Օպերայի և բալետի ազգային ակադեմիական թատրոնի բեմում: