ՌԴ Պետդումայում ԱՊՀ երկրների հարցերով հանձնաժողովի նախագահի տեղակալ Օլեգ Լեբեդևը հայտարարել է, որ Գյումրիում 7 հոգանոց ընտանիքի սպանության համար մեղադրվող և հանցանքը խոստովանած Վալերի Պերմյակովի դատավարությունը տեղի է ունենալու Հայաստանում: Այս մասին հաղորդում է «ՏԱՍՍ»-ը:
«Ռուսաստանը հնարավոր բոլոր քայլերը ձեռնարկեց, որ դատավարությունն անցնի Հայաստանի տարածքում, ինչպես որ մեզ խնդրել էր Հայաստանի ժողովուրդը»,- հայտարարել է Լեբեդևը` Պետդումայի և ՀՀ Ազգային ժողովի մասնագիտացված հանձնաժողովների հանդիպման ժամանակ:
Հիշեցնենք, որ Գյումրիում տեղակայված ռուսական ռազմաբազայի զինծառայող Վալերի Պերմյակովը հունվարի 12-ին մտել էր Ավետիսյանների բնակարան՝ սպանելով ընտանիքի 6 անդամներին և վիրավորելով ընտանիքի ամենափոքր անդամին՝ 6 ամսական Սերյոժային: Վերջինը մահացել էր դեպքից ուղիղ մեկ շաբաթ անց՝ հիվանդանոցում: