Այսօր աշխարհում տարածվում է տուբերկուլյոզի տեսակ, որը դիմադրողականություն ունի հակատուբերկուլյոզային բոլոր դեղամիջոցների նկատմամբ: Ժամանակին տուբերկուլյոզը մահացու հիվանդություն էր, որ սպանում էր հարյուրավոր մարդկանց՝ հարուստ թե աղքատ: Հակաբիոտիկների հայտնագործությունից հետո տուբերկուլյոզը դարձավ բուժելի հիվանդություն: Սակայն այսօր այդ հիվանդության մի տեսակ է ձևավորվել, որը մինչ օրս հայտնի և ոչ մի հակաբիոտիկով չի բուժվում: Անցյալ տարի Առողջապահության համաշխարհային կազմակերպությունը հայտարարել է, որ գրանցվել է 480 հազար նոր դեպք, երբ այս հիվանդությունն անընկալողունակություն է դրսևորել դեղորայքային բուժման հանդեպ:
Արդեն 2050 թվականին տուբերկուլյոզի համաճարակին կարող է զոհ գնալ 75 միլիոն մարդ: Այս հաշվարկը ներկայացրել են բրիտանական խորհրդարանային խմբի մի խումբ փորձագետներ:
Տուբերկուլյոզն այժմ աշխարհում երկրորդ ամենամահացու վարակիչ հիվանդությունն է ՄԻԱՎ-ից հետո: Նրա բուժումը դժվարացնում է նաև արդյունավետ պատվաստանյութի բացակայությունը: Գոյություն ունեցող միակ արդյունավետ պատվաստանյութը միայն երեխաների որոշ խմբի է պաշտպանում առավել ծանր տեսակներից՝ ներառյալ ուղեղի վրա ազդող տեսակը: Սակայն այն չի ապահովում առավել տարածված թոքային տուբերկուլյոզից: