Վիճակագրությունը փաստում է՝ մոլորակի վրա կարճատեսության՝ միոպիայի մասշտաբները վարակի բնույթ են կրում: Օրեր առաջ ավստրալացի գիտնականները հայտարարել էին, որ ըստ իրենց հետազոտության արդյունքների՝ կարճատեսության պատճառը բաց օդում քիչ խաղալն է: Այժմ նրանք հավելյալ տեղեկություններ են հրապարակել: Պարզվում է, որ ոչ համակարգչային խաղերը, ոչ գենետիկան, ոչ էլ գիրք կարդալը տեսողության համար այնքան վտանգ չեն ներկայացնում, որքան լույսի պակասը:
Այն, ինչ անհրաժեշտ է մարդուն աչքի լույսը պահպանելու համար՝ օրական առնվազն 3 ժամ արևի լույսի տակ անցկացնելն է:
Կարճատեսությունն առաջանում է ակնախնձորի երկարացման պատճառով, ինչի հետևանքով պատկերն ամբողջանում է ցանցաթաղանթի առջև, ոչ թե՝ դրա վրա:
Մինչև 19 տարեկան անչափահասների ուսումնասիրություններից հետո գիտնականները հայտարարել են, որ տեսողական դեֆեկտն առաջանում է սենյակում լույսի պակասից: Երեխայի աչքին անհրաժեշտ է 10 հազար լյուքս լույս, ինչը համազոր է արևի լույսից լուսավորմանը: Համեմատության համար նշենք, որ լավ լուսավորված դասասենյակի լուսավորությունը հասնում է մոտ 500 լյուքսի:
Նշենք, որ կես դարի ընթացքում Եվրոպայում և ԱՄՆ-ում կարճատեսների քանակը ավելի քան կրկնապատկվել է: Իսկ Արևելյան Ասիայում դրությունը ծայրահեղ է: 60 տարի առաջ Չինաստանի բնակչության միայն 10-20 %-ն էր կարճատես, իսկ այսօր՝ դեռահասների 90 %-ը: Սեուլում անչափահասների կարճատեսության ցուցանիշը կազմում է 95,6 %:
Ըստ հաշվարկների՝ այս տասնամյակի ավարտին մոլորակի բնակչության մեկ երրորդը կտառապի կարճատեսությամբ: