Խորհրդարանն առաջին ընթերցմամբ քննարկում է կառավարության ներկայացրած «Անձնական տվյալների պաշտպանության մասին» օրենքում լրացումներ կատարելու նախագծերի փաթեթը: ՀՀ արդարադատության նախարարի առաջին տեղակալ Արսեն Մկրտչյանի խոսքով` նախագծերի ընդունման արդյունքում կերաշխավորվի անձնական և ընտանեկան կյանքի անձեռնմխելիության իրավունքի պաշտպանությունն անձնական տվյալների մշակման բնագավառում:
Օրինագծի վերաբերյալ իր ելույթում ԱԺ ՀԱԿ խմբակցության ղեկավար Լևոն Զուրաբյանն անդրադարձավ, իր խոսքով ասած` հատուկ ծառայությունների կողմից իշխանության ընդդիմախոսների նկատմամբ իրականացվող գաղտնալսումներին ու անձնական տվյալների հավաքագրմանը: «Եթե ֆինանսներն ու ջանքերը ծախսվեին ոչ թե ընդդիմադիրների լրտեսման ուղղությամբ, այլ` հակառակորդի դեմ, այլ վիճակ կլիներ սահմանին: Ապօրինի գաղտնալսման օրինակների համար հեռու պետք չէ գնալ. իմ և Օսկանյանի մասնավոր խոսակցությունը ձեզ օրինակ: Խոսակցությունը, որը տեղադրվել էր ինտերնետում, այնպես էր մոնտաժված, որ մատնում էր իշխանության քարոզչական նպատակները: Ասացի քննիչին, որ գիտես` պետք չէր չարչարվել, բոլոր հետքերը տանելու էին դեպի հատուկ ծառայություններ, բայց լավատես էր, ասաց` կգտնի հանցագործներին, դրանից հետո էլ բան չեմ լսել քննիչի մասին»,- հիշեց պատգամավորը: