Արթուր Իսպիրյան. «Տարիներով ստեղծած ու ձեռք բերած մեր մշակույթն ու ինտելեկտը մի քանի հոգի հենց այնպես իրավունք չունեն գետնին գցել, տրորել, իրենց ճաշակով դարձնել»
 Հեռուստատեսության անճաշակ ու անվերահսկելի իրավիճակի, մի շարք երաժիշտների եթերում չերևալու, դիլետանտների բազմացման, ու ինչ-որ բան փրկելու ակնկալիքների ու հասարակական ակտիվ գործունեության մասին ՄԱՄՈՒԼ.am-ի թղթակիցը զրուցել է երգիչ Արթուր Իսպիրյանի հետ, ում խոսքով` եթերում չերևալը դեռ չի նշանակում պասիվ լինել: «Այսօր եթերն է որոշում ակտի՞վ ես, թե` ոչ: Ես ավելի շատ ակտիվ եմ իմ ստուդիական ձայնագրություններով, քան հեռուստատեսությամբ երևալով: Նայելով մեր հեռուստատեսության որակն` այնքան էլ ցանկություն չի առաջանում ակտիվ լինել եթերում: Բացի այդ, եթերում ակտիվ լինել-չլինելն իմ խնդիրը չէ, դա ավելի շատ հեռուստատեսությունների խնդիրն է, որոնք այսօր հասարակությանը ճաշակ են թելադրում»,- պարզաբանեց Արթուր Իսպիրյանը: Նրա համոզմամբ` արդեն 20 տարի է այդ խնդիրն ունենք: «Ոչ ճիշտ կադրային ընտրություններ են կատարվում հեռուստատեսությունում` մարդիկ իրենց ճիշտ տեղում չեն: Միակ պատուհանը, որտեղից ես կարողանում եմ ներկայացնել իմ երգարվեստը, դա «Երգ երգոց» հաղորդումն է, որն ինձ եթեր է տրամադրում: Իսկ մնացած հեռուստատեսությունները, կարելի է ասել, երաժշտական կոմերցիոն բիզնեսով են զբաղվում: Արդյունքում շատ երաժիշտներ տուժում են: Խոսքը միայն իմ մասին չէ, մենք շատ երաժիշտներ ունենք, որ այսօր եթերում չեն, բայց հրաշալի երաժիշտներ են: Ամեն հեռուստատեսության ղեկավար իր ճաշակն է թելադրում, այդտեղից էլ ամեն ինչ սկսվում է, պրոֆեսիոնալիզմ չկա»,- նշեց երգիչը:  «Օրերս Նարա Շլեպչյանի ծնունդն էինք նշում «Երգ երգոց» հաղորդման շրջանակներում, հավաքվել էին խորհրդային տարիների հաղորդավարները: Նրանց առոգանությունը, տեսքը, հագուկապն ու ինտելեկտը տեսնելով` ուղղակի զարմանում եմ, որ այդ մարդիկ այսօր եթերում չեն, ովքեր պետք է դաստիարակեն, կրթեն նոր սերունդ»,- ասաց Արթուրը: Նրա կարծիքով` միանգամից կապն անցյալի հետ կտրվեց:  «Պրոֆեսիոնալները, որ կային ռադիոյում և հեռուստատեսությունում, անկախությունից հետո միանգամից փոխարինվեցին բարեկամ-հարազատներով` դարձնելով ոչ ֆիլտրված եթեր: Դա է պատճառը, որ մենք այսօր տեսնում ենք այդ լկտի սերիալները, որոնք չեմ ցանկանում, որ երեխաներս տեսնեն: Առանց մտածելու, որ մի ամբողջ սերունդ են փչացնում, հեռուստատեսությամբ էդպիսի աղբ են մատուցում ժողովրդին: Այսօր դուրս ես գալիս փողոց, կարծես բոլորը «սերիալի միջով ման գան», երիտասարդները ձգտում են նմանվել սերիալի հանցագործ հերոսներին»,- մտահոգվում է երգիչը, ում կարծիքով` այս ամենը վերահսկելու ու փոխելու կադրային փոփոխություն է պետք անել: «Ու ոչ միայն հեռուստատեսությունում, այլ` վերևից ներքև պետք է փոխել ու լվանալ: Չեմ կարծում, որ շատ ուշ է: Դեռ հնարավոր է ինչ որ մի բան փրկել: Տարիներով ստեղծած ու ձեռք բերած մեր մշակույթն ու ինտելեկտը ինչ որ մի քանի հոգի հենց այնպես իրավունք չունեն գետնին գցեն, տրորեն ու ամեն ինչ իրենց ճաշակով ու մակարդակին համապատասխան դարձնեն»,- մեզ հետ զրույցում անկեղծացավ երգիչը: Մշակութային գործիչներից շատերն այսօր նախընտրում են լռել` պատճառաբանելով, որ իրենց ձայնը «վերևներում» լսելի չէ: Արթուր Իսպիրյանն ի տարբերություն ոմանց, հասարակական ակտիվ գործունեություն է ծավալում` չվախենալով քաղաքական հետապնդումներից:  «Սիրելով իմ քաղաքը, իմ երկիրը, շատ թերություններ նկատելով բարձրաձայնում եմ: Այն, ինչ պետք է բոլորն անեն: Հիմնականում բողոքս վերաբերում է մեր քաղաքի բնապահպանության խնդրին, աղբահանությանը, քաղաքաշինությանն ու տրանսպորտին: Դիզայներների ահավոր աշխատանքի շնորհիվ քաղաքը հետամնաց արաբական երկրի տպավորություն է թողնում. գովազդային պաստառներիս սկսած»,- անկեղծացավ Արթուրը: Նրա խոսքով` քաղաքական ճնշում երբևէ չի եղել իր նկատմամբ: «Եվ չեմ էլ սպասում, որ կլինի, քանի որ ես չեմ խոսում ճշմարտությունը` ինչ որ մեկի պաշտոնը զբաղեցնելու համար»:  Ամփոփելով զրույցը` նշենք, որ երգիչը փոքր համերգներով միշտ հանդես է գալիս «Ջազ բենդի» հետ: Նրա խոսքով` այս տարի թեպետ դանդաղ է աշխատում, բայց կլինեն ձայնագրություններ, նոր տեսահոլովակներ: «Չնայած չեմ սիրում այդ բառը, բայց հասկանում եմ, որ շատ անհրաժեշտ է տեսահոլովակ կոչվածը, որպեսզի ակտիվությունը երևա»-ամփոփեց երգիչը:  |
