Ինչու է ամենավատ սնվող երկրների ցուցակում Հայաստանն առաջինը
Աշխարհի 197 երկրներում անցկացված գլոբալ հետազոտության հեղինակները հրապարակել են ամենաանառողջ սննդակարգով երկրների ցուցակը, որտեղ Հայաստանը գլխավորել է տասնյակը: Այդ ցուցակում երկրորդ և երրորդ տեղը զբաղեցնում են Բելգիան և Հունգարիան: Իսկ ամենալավ սնվող երկրների եռյակը կազմել են Չադը, Սիրեա-Լեոնան և Մալին: Global Burden of Diseases Nutrition and Chronic Diseases Expert Group-ի կողմից (NutriCoDE) անցկացված հետազոտության շրջանակներում ընդգրկվել է 4.5 միլիարդ չափահաս մարդ` մոլորակի բնակչության 90 տոկոսը: Գիտնականների հավաստմամբ` առողջ սննդակարգը ենթադրում է մրգերի, բանջարեղենի, ընդեղենի օգտագործում: Իսկ անառողջ համարվում է ֆասթ-ֆուդը, պահածոյացված ու տապակած սնունդը: Հայաստանի Սպառողների ազգային ակադեմիայի փոխնախագահ Ռուբեն Հայթյանի խոսքով` ինչ վերաբերում է ներկայումս հայկական շուկայում անվտանգ սննդի առկայությանը՝ տեղական արտադրանքը շատ ավելի որակյալ է, քան ներկրված արտադրանքը: «Արտասահմանից ներկրված արտադրանքի մեջ շատ են օգտագործվում հավելանյութեր, մինչդեռ, մեր տեղական շուկայի փոքր լինելով պայմանավորված՝ մթերքի պահպանման խնդիր չկա, այդ իսկ պատճառով էլ դրանք չեն պարունակում տարբեր հավելանյութեր և գունանյութեր»,- պարզաբանում է Ռուբեն Հայթյանը: Հայաստանի Սպառողների ազգային ակադեմիայի փոխնախագահ Ռուբեն Հայթյան Իսկ սննդաբան Վարդանուշ Պետրոսյանն առավել վտանգավոր է համարում գունավոր, գազավորված ըմպելիքներն ու երշիկեղենը և խորհուրդ է տալիս հեռու նմալ հատկապես դրանց օգտագործումից: «Կան մարդիկ, ովքեր գիտակցելով շարունակում են օգտագործել վնասակար սնունդ: Նրանց կարող եմ խորհուրդ տալ պարզապես չգնել: Ես ինքս հրաժարվում եմ անառողջ սննդից»,- ՄԱՄՈՒԼ.am-ի թղթակցի հետ զրույցում նշեց սննդաբանը: Սննդաբան Վարդանուշ Պետրոսյան |