Իրադարձություններ

     Փետրվարի 20-ին` ԳաֆԷսճեան սրահում «Երաժշտության կասկադ» շարքը կներկայացնի «Բանաստեղծը և երաժիշտը» բացառիկ նախագիծը, որի ընթացքում անվանի բանաստեղծ Ռազմիկ Դավոյանը կընթերցի իր բանաստեղծությունները, և կհնչեն Վահան Արծրունու երգերը` գրված Ռ. Դավոյանի բանաստեղծությունների հիման վրա:
Ինչպես ՄԱՄՈՒԼ.am լրատվականի թղթակցի հետ զրույցում նշեց Վահան Արծրունին` մտահղացումը վաղուց խմորվող նախագիծ էր, որի անհրաժեշտությունը թելադրեց ժամանակը:
«Ռազմիկ Դավոյանի նախաձեռնությունն է, որը դեռ անցյալ տարի պետք է իրականացնեինք, բայց խանգարող հանգամանքներ եղան: Նախկինում շատ ընդունված են եղել ստեղծագործությունները` հեղինակի ընթերցմամբ, և մեր ծրագիրը փորձ է վերադարձնել արվեստասերների և հեղինակի հանդիպումն ու շփումը»,- նշեց երաժիշտն ու խոստովանեց, որ առաջին փորձը կթելադրի` նախագիծը կլինի շարունակական, թե` ոչ: Ինչպես նշեց Վահան Արծրունին` չնայած դեռ 20 օր կա համերգին, բայց հետաքրքրվողների թիվը մեծ է: «Երեկոն` երաժշտության և պոեզիայի սիրահարների համար մեծ իրադարձություն է լինելու: Բեմի վրա ներկա կլինեն բանաստեղծն ու նվագախումբը, ներկայացնելով տարբեր ժամանակների ու ժանրի բանաստեղծություններ` երաժշտական մեջբերումներով: Այդ օրը կհնչի իմ երգերի ամբողջ շարքը, որոնք Ռազմիկ Դավոյանի գրչին են պատկանում»,- ամփոփեց Վահան Արծրունին: