Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ապպատուրայը հայտարարել է, որ դաշինքը ոչ մի դեր չի խաղում Լեռնային Ղարաբաղի հակամարտության կարգավորման հարցում: «Ես չեմ կարծում, թե ՆԱՏՕ-ն որոշակիորեն կարող է օգնել գործընթացի առաջխաղացման հարցում, բայց ՆԱՏՕ-ն սատարում է ԵԱՀԿ Մինսկի խմբին հակամարտության կարգավորման հարցում»,- ադրբեջանական «Թրենդ» գործակալությանը հայտնել է Ապպատուրայը: Նրա խոսքերով` ԼՂՀ հակամարտության կարգավորումը միջազգային ուշադրության կենտրոնում է: Նա հատուկ մատնանշել է այն հանգամանքը, որ վերջերս Ֆրանսիայի նախագահ Ֆրանսուա Օլանդը համատեղ բանակցություններ է վարել Հայաստանի և Ադրբեջանի նախագահների հետ: