Ռուսաստանը չեղարկել է ԱՊՀ միջպետական հետախուզման մեջ գտնվող ՀՀ պաշտպանության նախկին նախարար Միքայել Հարությունյանի նկատմամբ հետախուզումն իր տարածքում: Այս մասին հաղորդում է Интерфакс-ը՝ վկայակոչելով իրազեկ աղբյուրը:
«Հարությունյանի նկատմամբ 2008թ. մարտի 1-ի գործով նյութերն ուսումնասիրելուց հետո որոշում է ընդունվել չեղարկել ՌԴ տարածքում նրա հետախուզումը»,- ասել է գործակալության աղբյուրը:
Այդպիսով, աղբյուրի խոսքով, Ռուսաստանում նրան ոչինչ չի սպառնում:
Գործակալության աղբյուրը հստակեցրել է նաև, որ ավելի վաղ Մոսկվային պաշտպանության նախկին նախարարի ձերբակալման և հանձնման վերաբերյալ հարցում էր ուղարկվել ոչ թե ՀՀ դատախազությունից, այլ Միջպետական հետախուզության գծով:
Ավելի վաղ հայտնի էր դարձել, որ Ռուսաստանը Միքայել Հարությունյանին չի արտահանձնի Հայաստանին, քանի որ վերջինն ունի ռուսական քաղաքացիություն: