ԱՄՆ-ը չի բացառում ցանկացած երկրի նկատմամբ պատժամիջոցների սահմանումը, որը կգնի ռուսական С-400 «Տրիումֆ» զենիթահրթիռային համակարգերը: Այս մասին հայտարարել է Պետդեպարտամենտի պաշտոնական ներկայացուցիչ Հեզեր Նոյերթը:
«Մենք դեմ ենք ողջ աշխարհում մեր գործընկերների և դաշնակիցների կողմից ռուսական С-400-ների գնմանը: Դա կարող է հանգեցնել պատժամիջոցների»,- ասել է Նոյերթը՝ հիշեցնելով Թուրքիայի դեմ հնարավոր պատժամիջոցների մասին:
«ՆԱՏՕ-ի մեր դաշնակիցը, ինչպիսին Թուրքիան է, օգտագործում է С-400-ները, և դա հակասում է մեր քաղաքականությանը»,- նրա խոսքը մեջբերում է РИА Новости-ն:
2017թ. Անկարան և Մոսկվան պայմանագիր էին կնքել С-400-ների մատակարարման շուրջ: ԱՄՆ-ը բազմիցս դժգոհություն էր հայտնել այդ կապակցությամբ և Թուրքիային սպառնացել պատժամիջոցներով, այդ թվում նաև ամերիկյան 5-րդ սերնդի F-35 կործանիչների մատակարարման արգելքով:
Սպառնալիքներին ի պատասխան՝ Թուրքիայի նախագահ Ռեջեփ Էրդողանը հայտարարել էր, որ Անկարան չի հրաժարվի ռուսական С-400-ներից: