Համացանց

Բլոգեր Իզաբելլա Աբգարյանը իր ֆեյսբուքյան էջում գրել է․

Երևանի ավագանու ընտրությունների արդյունքները շատ ավելի լուրջ ցուցիչ կլինեն, քան շատերը կարծում են:

Տեսնում ենք, որ շատերը, ոգևորված լինելով ՀՀԿ մոնոլիտի փլուզման փաստից, ընտրություններին մասնակցության հայտ են ներկայացնում:
     Ինչ խոսք, ազատ և արդար ընտրությունների մասնակցելը գայթակղիչ է: Բայց կան այլ գործոններ, որոնք պետք է հաշվի առնել:

Այլևս քիչ ձայն ստանալու դեպքում քաղաքական ուժերը չեն կարողանա «մահանա բռնել» կոռուպցիան, կեղծիքները և այլն: Ուստի պետք է պատրաստ լինեն առերեսվել վստահության տոկոսին, որը կստանան՝ դուր գա նրանց այդ տոկոսը, թե՝ ոչ:

Ավագանու ընտրություններից ոչ շատ ժամանակ անց տեղի կունենան ԱԺ ընտրությունները: Ավագանու ընտրություններին ստացած տոկոսը հոգեբանական ազդեցություն կթողնի ընտրողի վրա, այդ թվում՝ մարզերի: Մի մոռացեք, որ Երևանում է բնակվում ՀՀ բնակչության մոտ կեսը:

Իմ կարծիքով, շատ ավելի լավ է բաց թողնել այս ընտրությունները, եթե ուժեղանալու, թիմ հավաքելու, պայմանավորվածություններ ձեռք բերելու, դաշինքներ կազմելու կարիք ունես: Ու ամբողջ ուժերով այսօր իսկ սկսել պատրաստվել ԱԺ ընտրություններին: Որովհետև հիմա ի ցույց դրած թուլությունը վատ ծառայություն կմատուցի ԱԺ ընտրություններին:

Բացի այդ, գործ ունենք հետհեղափոխական շրջանի հետ, երբ այն ատամներով պահել ցանկացողները կսկսեն այլ ուժերի դիտարկել որպես ձայն փոշիացնող, եթե չտեսնեն նրանց քաշը, հաղթելու գոնե մոտավոր շանսերը:

Թեպետ հուսով եմ, որ կեղտոտ ու ագրեսիվ հակաքարոզչություն չի լինի, բայց և այնպես բախում կլինի, որը կթողնի իր հետևանքը:

Այնպես որ, ճիշտ հաշվարկների ու հետևանքների մասին մտածելու ժամանակն է՝ միշտ աչքի առաջ ունենալով սպասվող ԱԺ ընտրությունները: