ԶԼՄ-ները պատմական որոշում են որակում Ռուսաստանի, Ադրբեջանի, Իրանի, Ղազախստանի ու Թուրքմենստանի առաջնորդների միջև օգոստոսի 12-ին կնքված հռչակագիրը Կասպից ծովի իրավական կարգավիճակի մասին, որի շուրջ աշխատանքները տարվել են ավելի քան 20 տարի: Այն, ըստ Ղազախստանի նախագահ Նուրսուլթան Նազարբաևի, պետք է դառնա տարածաշրջանում անվտանգության երաշխիք:
Համաձայն փաստաթղթի՝ Կասպիցի ջրային մակերեսի հիմնական մասը շարունակում է մնալ կողմերի ընդհանուր օգտագործման տարածք, իսկ հատակն ու ընդերքը բաժանվում են հարևանների միջև՝ ըստ միջազգային իրավունքի հիման վրա կայացված պայմանավորվածությունների: Նավագնացությունը, ձկնորսությունը, գիտական հետազոտությունները և գլխավոր խողովակաշարերի անցկացումը կիրականացվեն կողմերի կողմից ձեռք բերված համաձայնությամբ:
Լայնածավալ ծովային նախագծերի իրագործման համար պարտադիր պայման է դիտվում էկոլոգիական գործոնը: Որոշումը նաև բացառում է Կասպիցի վրա տարածաշրջանի երկրներից բացի այլ երկրի ռազմական ներկայությունը: