Իրադարձություններ

Այսօր ՀՖՖ տեխնիկական կենտրոնում ֆուտբոլի Հայաստանի ազգային հավաքականը բաց մարզում անցկացրեց, որից հետո ֆուտբոլիստները պատասխանեցին լրագրողների հարցերին։ Հայաստանի ազգային հավաքականի ավագ Հենրիխ Մխիթարյանն անդրադարձավ «Արսենալ»-ի գլխավոր մարզչի պաշտոնը թողած Արսեն Վենգերին և նորանշանակ մարզիչ Ունաի Էմերիին։

«Դժվար էր հրաժեշտ տալ, չնայած որ 6 ամիս եմ աշխատել Վենգերի հետ, բայց կարող եմ ասել՝ տպավորությունները շատ-շատ մեծ էին՝ թե՛ որպես մարզիչ, թե՛ որպես մարդ: Ցավով նրան ճանապարհեցինք: Կարող ենք միայն բարի գալուստ մաղթել նոր մարզչին, ում հետ դեռ չեմ շփվել: Հուսով եմ՝ նա «Արսենալ»-ին նոր բարձունք կբարձրացնի»,- Մխիթարյանի խոսքերն է փոխանցում MAMUL.am-ի թղթակիցը:

Խոսելով Լոնդոնի կյանքի մասին՝ Մխիթարյանը նշեց. «Շատ լավ է կյանքը: Բոլորը գիտեն, որ Լոնդոնը յուրահատուկ քաղաք է, տարբերվում է բոլոր քաղաքներից՝ շատ պոզիտիվ է և լավը: Չնայած՝ եղանակը միշտ մռայլ է, բայց դա չի ազդում մարդու հոգեկան վիճակի վրա վրա: Ազատ ժամանակ փորձում եմ հնարավորինս շատ հանգստանալ և ուժերս հավաքել մարզումների համար»։