Խնդրում ենք սպասել...

Իրադարձություններ

«Ձեր կյանքն ու գործունեությունը ոգեշնչում է միլիոնավոր մարդկանց». Նիկոլ Փաշինյանի ուղերձը՝ Շառլ Ազնավուրին

11:50, երեքշաբթի, 22 մայիսի, 2018 թ.
«Ձեր կյանքն ու գործունեությունը ոգեշնչում է միլիոնավոր մարդկանց». Նիկոլ Փաշինյանի ուղերձը՝ Շառլ Ազնավուրին

Շառլ Ազնավուրի ծննդյան 94-րդ տարեդարձի կապակցությամբ ՀՀ վարչապետ Նիկոլ Փաշինյանը շնորհավորական ուղերձ է հղել. «Սիրելի՛ Շառլ Ազնավուր, մեր ողջ ժողովրդի և անձամբ իմ անունից ջերմորեն շնորհավորում եմ Ձեզ ծննդյան տարեդարձի կապակցությամբ։

Ձեր կյանքը և գործունեությունը մարդկային տաղանդի, կամքի, աշխատասիրության հաղթանակի բացառիկ օրինակ են, որը ոգեշնչել և ոգեշնչում է միլիոնավոր մարդկանց՝ ամբողջ աշխարհում: Հայաստանի կյանքում տեղի ունեցող շրջադարձային փոփոխությունների այս ժամանակահատվածում Ձեր կյանքի ու գործունեության պատմությունը առավել քան օրինակելի է, որովհետև ապացուցում է, որ մարդկային կամքն ու հետևողականությունը չեն ճանաչում արգելքներ, և ցանկացած նպատակ հասանելի է, եթե ունես երազանք, վստահություն, համբերություն և հավատ:

Սիրելի՛ Շառլ Ազնավուր, հենց այսպիսի հատկանիշների շնորհիվ մեր ժողովուրդը վերականգնեց իր իշխանությունը 2018 թվականի ապրիլ-մայիսին: Եվ մենք Ձեզ անհամբեր սպասում ենք Հայաստանում: Մենք անհամբեր ենք, որ Դուք սեփական աչքերով տեսնեք և համոզվեք, որ Հայաստանի քաղաքացին, հայ ժողովուրդը հաղթել է և կերտել սեփական տաղանդի, կամքի, աշխատասիրության, երազանքի հաղթանակը:

Ձեզ քաջառողջություն և անսպառ եռանդ եմ մաղթում: Հայրենիքին մատուցած Ձեր անուրանալի ծառայությունները ջերմացրել և ջերմացնում են բոլորիս»,- ասված է ուղերձում:

8037 | 0
Facebook