Թուրքիայի Դիարբեքիր նահանգում՝ Լիջե և Քուլփ շրջանների 69 գյուղերում պարետային ժամ է հայտարարվել։ Պարետային ժամն ուժի մեջ է մտել Թուրքիայի ժամանակով 23։00-ին:
Դիարբեքիրի նահանգապետարանի հայտարարության մեջ ասված է, որ պարետային ժամի ընթացքում Թուրքիայի բանակի ստորաբաժանումները ռազմական գործողություններ են իրականացնելու երկրում ահաբեկչական համարվող «Քուրդիստանի բանվորական կուսակցության» (ՔԲԿ-PKK) զինյալների դեմ։ Դրա ընթացքում Թուրքիայի զինուժը կփորձի ոչնչացնել քուրդ զինյալներին պատկանող խրամատներն, ինչպես նաև՝ զենք ու զինամթերքը։ Կիրականացվեն նաև ականազերծման աշխատանքներ:
Ռազմական գործողությունները հիմնականում ընթանալու են անտառային և լեռնային շրջաններում, քանի որ, ըստ թուրքական կողմի՝ այդտեղ թաքնվում են PKK-ի մի շարք հրամանատարներ։
Պարետային ժամը կշարունակվի այնքան ժամանակ, մինչև նահանգապետարանը հավելյալ նոր ծանուցում կանի, գրում է Ermenihaber.am-ը՝ հղում անելով CNN Türk-ին: