Միջազգային

Բրիտանական Guardian պարբերականը հոդված է հրապարակել Daphne Project-ի կողմից անցկացված հետաքննության մասին, որում ասվում է, որ Ադրբեջանի իշխող ընտանիքները՝ անանուն սեփականությամբ տասնյակ ընկերությունների ենթադրյալ շահառուները, Եվրոպայում անշարժ գույքը, բիզնեսն ու հյուրանոցներն օգտագործել են ներդրումների համար:

Պարբերականը հաղորդում է, որ հետաքննության ժամանակ հայտնաբերվել է, որ վերջին 3 տարում մի քանի ընկերությունների ցանցեր մասնավոր բանկեր են օգտագործել Մալթայում՝ Մեծ Բրիտանիայում, Իսպանիայում, Ֆրանսիայում, Վրաստանում և Չեռնոգորիայում ներդրումներ կատարելու համար: Այդ տեղեկության մասին գրել են լրագրողներ Ջուլիետ Հարսայդն ու Սթեֆանի Քիրշհեսները:

«Այդ ընկերություններից շատերը գործել են Իլհամ Ալիևի և նրա ընտանիքի, ինչպես նաև Ադրբեջանի արտակարգ իրավիճակների նախարար Քամալադին Հեյդարովի որդիների շահերից»,- ասվում է հոդվածում:

«Ալիևի աղջիկները՝ Լեյլա և Արզու Ալիևաները, չեն մեկնաբանել: Հեյդարովի որդիների իրավաբաններն ասել են, որ իրենց հաճախորդ ընկերությունները բացարձակ լեգիտիմ և օրինական բիզնես են վարում»,- հավելում է Guardian-ը:

Պարբերականը հայտնում է նաև, որ մալթիական բանկը ևս հրաժարվել է մեկնաբանությունից:

Նշենք, որ Daphne Project-ը ստեղծվել է Ադրբեջանի և Մալթայի բարձրաստիճան պաշտոնյաների միջև կնքված կոռուպցիոն գործարքները բացահայտած մալթացի լրագրող, Ադրբեջանի Դաֆնե Կարուանա Գալիցիայի հետաքննությունը շարունակելու համար, ով զոհվեց անցած տարի մեքենայի պայթյունից: