Լրագրողի հարցին՝ արդյոք չի՞ կարծում, որ Ռուսաստանը կպաշտպանի Կարեն Կարապետյանի թեկնածությունը վարչապետի պաշտոնում, Նիկոլ Փաշինյանը պատասխանեց. «Հայաստանում կառավարության ձևավորումը ներքին գործ է և Հայաստանյան ժողովուրդն ինքը պետք է որոշի, թե ով պետք է լինի կառավարությունում, իսկ Ռուսաստանը դաշնակից ընկեր է Հայաստանի համար: Ես վստահ եմ, որ Ռուսաստանը կհարգի Հայաստանի ժողովրդի որոշումը:
Հաջորդ հարցին՝ Եթե «Հանրապետական» կուսակցությունը չընտրի ժողովրդի թեկնածուին՝ կընդունե՞ք ՀՀԿ-ի թեկնածուին, պատասխանեց. «Իհարկե ոչ, թավշյա հեղափոխությունը շարունակվում է, այն կշարունակվի՝ մինչև որ բոլոր նպատակներն իրականանան»:
Փաշինյանը նշեց, որ շատ վերլուծաբաններ կարծում էին, որ Սերժ Սարգսյանը հրաժարական չի տա, բայց նա հրաժարական տվեց: «Մյուս կետերի իրականացումը մեզ համար ավելի հեշտ է քան առաջինը: Ս. Սարգսյանի հրաժարականն ամենաբարդն էր: Մենք շարունակելու ենք մեր գործողությունները, մինչև մեր բոլոր նպատակները կյանքի կկոչվեն», - ասաց Փաշինյանը:
Հիշեցնենք՝ «Քաղաքացիական պայմանագիր» կուսակցության վարչության անդամ, «#Իմ քայլը» շարժման ղեկավար Նիկոլ Փաշինյանը պատասխանում է արտասահմանյան լրագրողների հարցերին: