Բրիտանական մամուլը հայտնել է «Կրեմլի ագրեսիայի հերթական ազդանշանի մասին»: Այդ ազդանշանն, ըստ բրիտանացի լրագրողների, ռուսական նոր «Дрель» ավիառումբն է:
Ըստ Daily Express-ի՝ 5-րդ սերնդի Սու-57 կործանիչների համար նախատեսված նորագույն ռումբը մեծացնում է Երրորդ համաշխարհային պատերազմի հնարավոր սկզբի մտավախությունները: Պարբերականը մեջբերում է ռումբի մշակող կոնցեռնի ներկայացուցչի խոսքը, ով նշել է, որ «Дрель»-ը կարող է խոցել թիրախը 30 կմ հեռավորության վրա՝ չներխուժելով հակառակորդի օդային տարածք:
Հաղորդվում է, որ ավիառումբը կարող է ոչնչացնել տանկեր կամ հրթիռային մարտկոց, ընդ որում, ռադարները ռումբը գրեթե չեն ճանաչում:
Daily Express-ը նշում է, որ Մոսկվան նոր ռումբը ցուցադրել է ռուս նախկին հետախույզ Սերգեյ Սկրիպալի թունավորման հետ կապված պատմությունից անմիջապես հետո:
«Մի քանի օր առաջ Ռուսաստանը պատասխանեց Արևմուտքին՝ արտաքսելով դիվանագետների, և այժմ մեծացնում է իր ռազմական ներուժը»,- ասվում է պարբերականի հոդվածում: