Ֆրանսիական Renault SA և ճապոնական Nissan Motor Co. ընկերությունները բանակցություններ են վարում միավորվելու և նոր ավտոարտադրություն ստեղծելու շուրջ, հաղորդում է Bloomberg-ը՝ հղում անելով իր աղբյուրներին:
Ներկայում Renault-ը ճապոնական ընկերությունում ունի 43% բաժնետոմս, իսկ Nissan-ը՝ ֆրանսիական ընկերությունում 15% բաժնետոմս:
Երկու ընկերությունների տնօրենների խորհրդի ղեկավար կդառնա Կառլոս Գոնը:
Ընդ որում, ըստ գործակալության աղբյուրների, նոր ընկերությունը կարող է պահպանել Ճապոնիայում և Ֆրանսիայում շտաբ-բնակարանները:
Միևնույն ժամանակ, փորձագետները խոսում են տվյալ գործարքի հավանության դեպքում դժվարությունների մասին:
Ֆրանսիայի կառավարությունը, որը տիրապետում է Renault-ի 15% բաժնետոմսերին, քիչ հավանական է, որ հրաժարվի իր մասնաբաժնից: Թե՛ ֆրանսիական, թե՛ ճապոնական կառավարությունը պետք է հավանություն տա ավտոարտադրողների միավորմանը: Այդ առումով վերջնական համաձայնագիր դեռևս չի կնքվել:
Bloomberg-ը նշում է, որ վերջին մեկ տարում Renault-ի շուկայական արժեքն աճել է մոտ 15%-ով՝ մինչև 27,7 միլիարդ եվրո (34 միլիարդ դոլար), այն դեպքում, երբ Nissan-ի կապիտալացումը կրճատվել է 2%-ով և այժմ կազմում է մոտ 4,6 տրիլիոն իեն (43 միլիարդ դոլար):