Իրանի նախագահ Հասան Ռոհանին երեկ Ադրբեջանի նախագահ Իլհամ Ալիևի հետ հանդիպման ժամանակ խոսել է Լեռնային Ղարաբաղի հակամարտության կարգավորման ուղիների մասին:
Ռոհանիի խոսքով՝ տարածաշրջանում գոյություն ունեցող հարցերը պետք է լուծվեն քաղաքական ճանապարհով:
«Մենք վստահ ենք, որ Եմենի խնդիրը պետք է լուծվի քաղաքական, այլ ոչ թե ռազմական ճանապարհով: Կարծում ենք, որ սիրիական հարցը ևս պետք է լուծվի քաղաքական միջոցներով: Ադրբեջանն ու Իրանն այդ հարցում համակարծիք են: Մենք նաև կարծում ենք, որ Լեռնային Ղարաբաղի խնդիրը ևս պետք է լուծվի քաղաքական ճանապարհով: Ցանկանում ենք Հայաստանի և Ադրբեջանի ջանքերով տարածաշրջանում կայունության ամրապնդման ականատեսը լինել: Ուրախ ենք, որ այդ հարցով դիվանագիտական ջանքեր են տարվում: Մեզ համար կարևոր է երկրների տարածքային ամբողջականության և տարածաշրջանի աշխարհագրության պահպանումը: Միջազգային սկզբունքները պետք է հարցի լուծման գործիք դառնան»,- ասել է Ռոհանին: