Մեծ Բրիտանիայի վարչապետ Թերեզա Մեյը, Ֆրանսիայի նախագահ Էմանուել Մակրոնն ու Գերմանիայի կանցլեր Անգելա Մերկելը երեկ եռակողմ բանակցությունների արդյունքներով հաստատել են, որ Ռուսաստանը ներգրավված է Սոլսբերիում ռուս նախկին հետախույզ Սերգեյ Սկրիպալի և նրա դստեր թունավորմանը, և որ տեղի ունեցածի առավել համոզիչ բացատրություն չեն տեսնում: Այս մասին, Rbc-ի հաղորդմամբ, ասվում է Մեծ Բրիտանիայի կառավարության կայքում:
«ԵՄ առաջնորդները համաձայնության են եկել Ռուսաստանի գործողություններին պատասխանելու և առաջիկայում սերտ շփումները պահպանելու շուրջ»,- ասվում է համատեղ հայտարարության մեջ:
Նշվում է, որ Թերեզա Մեյը Մակրոնին և Մերկելին է ներկայացրել Ռուսաստանում արտադրվող նյարդապարալիտիկ նյութով թունավորման հետաքննության մանրամասները: Մեյը նաև հայտնել է քիմիական նյութի՝ համաշխարհային առաջատար գիտնականների կողմից հաջող նույնականացման մասին:
Ավելի վաղ ԵՄ առաջնորդների բանակցությունների արդյունքներով Ռուսաստանում ԵՄ դեսպանը հետ էր կանչվել: