Այսօր ՀՖՖ տեխնիկական կենտրոնում՝ Ֆուտբոլի ակադեմիայում տեղի ունեցավ Հայաստանի 2017 թվականի լավագույն ֆուտբոլիստների մրցանակաբաշխության արարողությունը։ Հայաստանի լավագույն ֆուտբոլիստ Հենրիխ Մխիթարյանը, մրցանակը ստանալուց հետո, նշեց, որ մեծ հաճույքով է ստանում պարգևը։
«Միշտ էլ հաճելի է լինել առաջինը: Չեմ ժխտի՝ այսօր էլ մեծ հաճույքով ստացա այդ պարգևը: Կփորձեմ հաջորդ տարիների ընթացքում ևս լինել առաջինը` հարգելով իմ թիմակիցներին, իհարկե։ Երեխաների համար հերոս լինելու մասին նշեմ, որ ես էլ եմ երեխա եղել, ես էլ գիտեմ, թե ինչ զգացողություն է դա: Ես էլ եմ ունեցել հերոսներ, ցանկացել եմ նմանվել ինչ-որ ֆուտբոլիստի: Դա շատ մեծ պատիվ է։ Նշանակում է` ինչ-որ բանի հասել ես, ինչ-որ մի բան արել ես այս երկրի համար, այն մարդկանց համար, ովքեր քեզ հետևում են: Դա շատ ուրախալի է»,- Մխիթարյանի խոսքերն է փոխանցում MAMUL.am-ի թղթակիցը։
Հարցին, արդյոք իրեն մրցակցությունից դուրս է զգում՝ ամեն տարի լավագույնը ճանաչվելով, Մխիթարյանը պատասխանեց․ «Ինձ չեմ համարում այնպիսի ֆուտբոլիստ, ով չունի մրցակից: Միշտ էլ փորձում եմ ինքս ինձ մրցակիցներ գտնել և մենամարտել նրանց դեմ: Դա քեզ ավելի ուժեղ է դարձնում: Հավաքականում ունենք շատ լավ, շնորհալի, ուժեղ ֆուտբոլիստներ, ու նրանց շնորհիվ է, որ ես կարողանում եմ լավագույնը դառնալ: Ես նրանց մրցակիցներ եմ համարում։ Շնորհակալ եմ նրանց այս մրցակցության համար»։