«Պաշտոնապես հայտարարում եմ՝ չի կարող լինել տեսագրություն, ըստ որի՝ մարտի 1-ին ցուցարարը կրակել է որևէ մեկի վրա»,- Փաշինյան-Կոստանյան բանավեճը շարունակվեց նաև «2008 թվականի մարտի 1-2-ի իրադարձությունների վերաբերյալ» ԱԺ հայտարարության նախագծի քվեարկությունից հետո:
«Պարոն Փաշինյանը, երբ ասում է՝ պաշտոնապես հայտարարում եմ, որ նման ձայնագրություն չկա, ես չեմ կարծում, որ նա կարող է պնդել՝ քրեական գործում ի՞նչ կա, ի՞նչ չկա: Ես դա գտնում եմ անպատասխանատու հայտարարություն»,- արձագանքեց Գևորգ Կոստանյանը:
«Եթե որևէ մեկը կարող է ապացուցել հակառակը, թող ապացուցի»,- ասաց Փաշինյանը:
Ելույթ ունեցավ նաև «Ծառուկյան» խմբակցության պատգամավոր Արարատ Զուրաբյանը. «Կարծում եմ՝ ոչ մեկ կասկած չունի, որ որևէ կրակոց ընդդիմության կողմից չի եղել: Սակայն հարց է առաջանում՝ եթե ընդդիմության կողմից կրակող չի եղել, իշխանությունն ինչո՞ւ է զենք գործածել»:
Հիշեցնենք՝ ձայների 9 կողմ, 56 դեմ հարաբերակցությամբ նախագիծը չէր ընդունվել: