Սիրիական պետական «Սանա» տեղեկատվական գործակալությունը հայտնում է, որ թուրքական ռեժիմի զինվորականներն ու նրանց վարձկաններն ամբողջությամբ գրավել են Աֆրին քաղաքը և տարբեր հանցագործություններ կատարել խաղաղ բնակիչների նկատմամբ՝ ավերելով նաև նրանց տները։ Նրանք ավերել են նաև քրդերի համար կարևոր նշանակություն ունեցող Քավայի՝ հերոս-դարբինի արձանը, որն ապստամբության ու անարդարության դեմ պայքարի խորհրդանիշն էր։
Աֆրինի վարչակազմի ներկայացուցիչ Օթման Շեյխ Իսան էլ հայտարարել է, որ Թուրքիայի հետ պատերազմը պարտիզանական պայքարի նոր փուլ է մտել այսօրվանից: Նա պնդում է, որ Թուրքիայի միակ նպատակը քրդերին բնաջնջելն է, թեև Էրդողանը բազմիցս հայտարարել է, իբրև թե պայքարում է միայն ահաբեկիչների դեմ:
Երեկ՝ քաղաք ներխուժելու նախօրեին, Թուրքիայի կողմից հովանավորվող հրետանին և ավիացիան հրետանակոծել են քաղաքը։ Զոհվել է 37 խաղաղ բնակիչ։ Շատերն ստիպված են եղել լքել քաղաքը և տեղափոխվել Նուբոլ և Ազ Զահրա բնակավայրեր։