Ռուսաստանում նոր միջուկային զենքի տեսակների մշակման մասին ՌԴ նախագահ Վլադիմիր Պուտինի հայտարարությունը Ռուսաստանի վերսկսվող ագրեսիայի բաղադրիչներից է: Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը, փոխանցում է The Voice of America-ն:
Ստոլտենբերգը նաև սպառազինությունների մրցավազքից խուսափելու հույս է հայտնել:
Անցյալ շաբաթ ՌԴ նախագահը ներկայացրեց միջուկային զենքի մի շարք նոր տեսակներ, որոնք, ըստ նրա, կարող են հարված հասցնել Երկրի ցանկացած կետի ուղղությամբ:
«Անշուշտ, մենք մտահոգված ենք: ՆԱՏՕ-ն նոր «սառը պատերազմ», ինչպես նաև սպառազինությունների մրցավազք չի ցանկանում»,- ասել է ՆԱՏՕ-ի գլխավոր քարտուղարը:
Ստոլտենբերգը հավելել է, որ ՆԱՏՕ-ն հայելային պատասխան չի տա Ռուսաստանի գործողություններին: «Մենք չենք պատասխանի Ռուսաստանին հայելային կերպով՝ հրթիռ՝ հրթիռի դեմ, զենք՝ զենքի դեմ, սակայն մենք արձագանքում ենք, քանի որ տեսնում ենք, որ Ռուսաստանն իրեն առավել ագրեսիվ է դրսևորում»,- նշել է նա: