Ի՞նչ գրականություն է այս տարի ձեռք բերելու Հայաստանի ազգային գրադարանը
2017-ին Հայաստանի ազգային գրադարանն ունեցել է շուրջ 30 հազար ընթերցող, տարվա ընթացքում գրադարան է այցելել շուրջ 247 հազար մարդ: 2018-ին ևս պետական բյուջեից հատկացվող գումարով (20 միլիոն դրամ) Գրադարանը «կթարմացնի» իր գրադարանային ֆոնդը: «Ի՞նչ գրականություն է ձեռք բերելու Ազգային գրադարանը: Ի՞նչ սկզբունքով եք առաջնորդվելու գրականություն ընտրելիս: Արդյո՞ք ուսումնասիրում եք Գրադարանի փաստացի և հնարավոր ընթերցողների պահանջարկը»,- հարցերը Մշակույթի նախարարն ուղղեց Գրադարանի տնօրենին: Արմեն Ամիրյանի համոզմամբ, Ազգային գրադարանի քաղաքականության հիմքում պետք է կարևորվի ընթերցողի պահանջարկը, իսկ հիմնական թիրախը պետք է լինի երիտասարդությունը, մասնավորապես, ուսանողությունը: Մասնագիտական գրականություն, որի փնտրտուքը վերջիններից երկար ժամանակ ու ջանք է պահանջում, հաճախ՝ անարդյունք: Գեղարվեստական, թարգմանական գրականություն... Ի վերջո, պահանջված գրականություն, որն այսօր հասանելի չէ Ազգային գրադարանի ընթերցողներին: Տիգրան Զարգարյանին նախարարը հորդորեց խորապես ուսումնասիրել պահանջարկը, անհրաժեշտ գրականությունը ձեռք բերելու համար համագործակցել միջազգային կրթական կառույցների, Հայաստանում գործող դեսպանատների, հնարավոր բոլոր օղակների հետ: Նախարարի հաջորդ պահանջն էր, որպեսզի նորացված գրադարանային ֆոնդի վերաբերյալ տեղեկատվությունը պատշաճորեն տարածվի հնարավոր բոլոր միջոցներով՝ սոցցանցերով, բջջային համապատասխան հավելվածով և այլն: Ազգային գրադարանի ներկայացուցիչների հետ նախարարը քննարկեց նաև Գրադարանի բակում երիտասարդների համար հաճելի միջավայր ստեղծելու գաղափարը, այս մասին տեղելացնում է նախարարությունը: |