ԱՄՆ նախագահ Դոնալդ Թրամփը լիովին խոստովանում է, որ ռուսական կողմը ոչ միայն փորձել է, այլև փաստացի միջամտել է 2016թ. ԱՄՆ-ի նախագահական ընտրություններին: Այս մասին հայտնում է Deutsche welle-ն՝ հղում անելով Սպիտակ տան պաշտոնական հայտարարությանը:
Սպիտակ տան մամուլի քարտուղար Սառա Սանդերսը փետրվարի 20-ին տեղի ունեցած ճեպազրույցի ժամանակ հայտարարել է, որ Թրամփն ակնհայտ է համարում ընտրություններին ռուսական միջամտությունը:
«Բացարձակ ակնհայտ է նաև այն, որ այդ միջամտությունը չի ազդել ընտրությունների վրա: Ակնհայտ է, որ Թրամփի նախընտրական շտաբը հաղթանակի հասնելու համար որևէ գործարք չի կնքել ռուսների հետ»,- ասել է Սանդերսը:
Նա նշել է, որ Թրամփը բազմիցս խոստովանել է ռուսական միջամտությունը:
Պատասխանելով այն հարցին, թե ինչու Թրամփը Ռուսաստանի դեմ նոր պատժամիջոցներ չսահմանեց, Սանդերսը միայն նշել է, որ ԱՄՆ նախագահը «շատ ավելի խիստ» է Ռուսաստանի նկատմամբ, քան նախկին նախագահ Բարաք Օբաման՝ 8 տարիների ընթացքում:
Ըստ Սպիտակ տան մամուլի քարտուղարի՝ պատժամիջոցները սահմանվում են ի պատասխան որոշակի խախտումների, որոնք տեղի չեն ունեցել:
Միևնույն ժամանակ, Սանդերսը նշել է Թրամփի որոշակի գործողություններ, որոնք Ռուսաստանին «չեն ոգևորում». դրանք են՝ հավելյալ ֆինանսավորում ԱՄՆ բանակի համար, էներգակիրների արտահանում Արևելյան Եվրոպա, պատժամիջոցների աջակցում, որոնք սահմանվել են Օբամայի վարչակազմի կողմից, սպառազինության տրամադրում Ուկրաինային և այլն: