ՆԱՏՕ-ի գլխավոր քարտուղար Յենս Ստոլտենբերգը Ռուսաստանին կոչ է արել բաց և թափանցիկ լինել Կալինինգրադի շրջանում «Իսկանդեր» հրթիռային համակարգերի տեղակայման հարցում, հաղորդում է Svoboda.org-ը:
Հյուսիսատլանտյան դաշինքի ղեկավարը հրաժարվել է պատասխանել այն հարցին, թե արդյոք Եվրոպայի սահմանին «Իսկանդեր»-ները տեղակայված են մշտական հիմքով: Ստոլտենբերգի խոսքով՝ Ռուսաստանը Կալինինգրադում մշտապես զարգացնում է ռազմական ենթակառուցվածքներն ու մեծացնում ռազմական ներկայությունը:
Փետրվարի սկզբին Լիտվայի նախագահ Դալյա Գրիբաուսկայտեն հայտարարել էր, որ Ռուսաստանը Կալինինգրադի շրջանում «Իսկանդեր» հրթիռային համակարգեր է տեղակայում: Դրանից հետո մտավախություններ էին առաջացել, որ հրթիռային համակարգերը կմնան քաղաքում մշտական հիմքով: