«Բռնությունը չունի արդարացում». բողոքի ակցիա` քաղաքապետարանի դիմաց
Երևանի ավագանու նիստերի ժամանակ այսօր տեղի ունեցած ծեծկռտուքից հետո մի շարք քաղաքացիներ «Բռնությունը չունի արդարացում» և այլ պաստառներով Երևանի քաղաքապետարանի դիմաց բողոքի ակցիա են իրականացրել: Նրանք սուլում և վանկարկում էին «բռնապետարան», «քաղաքապետքարան»: Քաղաքացիները նշում էին, որ որևէ մեկն իրավունք չունի բռնություն կիրառելու առավել ևս կնոջ նկատմամբ: Նրանք հայտարարությամբ հանդես եկան` պահանջելով քրեական պատասխանատվության ենթարկել «Երկիր ծիրանիի» կանանց վրա հարձակված անձանց։ Հայտարարությունում, մասնավորապես, ասված էր. «Մենք՝ Երևանի Քաղաքապետարանի դիմաց հավաքվածներս, որևէ այլ ելք չենք գտնում, քան գալ և պահանջել ազատել ավագանին այսօր ավագանու ընդդիմադիր կանանց վրա հարձակվող, ծեծի և սեռական ոտնձգության ենթարկող իշխանական տղամարդկանցից և քրեական պատասխանատվության ենթարկել նման հանցագործներին։ Հիշեցնենք, որ այսօր քաղաքապետարանում ավագնու նիստի ժամանակ միջադեպ տեղի ունեցավ. «Երկիր ծիրանի» խմբակցության անդամներն իրենց հետ Նուբարաշենից տարաներով կոյուղաջուր էին բերել քաղաքապետարան, ինչի պատճառով ծեծկռտուք սկսվեց ավագանու ՀՀԿ-ական և ընդդիմադիր անդամների միջև: Հիշեցնենք նաև, որ երեկ Երևանի Նուբարաշեն վարչական շրջանի բնակիչները փակել էին համայնք տանող ճանապարհը՝ պահանջելով լուծել կոյուղաջրերի տարիներով չլուծված խնդիրը, որի հոտը լցվում է բնակարաններ: |